नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले आफू जीवित रहेसम्म 'प्रतिक्रियावादी'हरूले सपना पूरा नहुने बताएका छन्।
माओवादी केन्द्रको हुलाकी राजमार्ग केन्द्रित तराई-मधेस जागरण अभियानअन्तर्गत शनिबार चितवनमा आयोजित सभालाई सम्बोधन गर्दै अध्यक्ष प्रचण्डले बरू त्यस्ता तत्वहरूलाई आफ्नै जीवनकालमा पूर्ण रूपले परास्त गरिने बताएका हुन्।
'हामी जीवित रहँदासम्म प्रतिक्रियावादीहरूको सपना पूरा हुनेछैन। बरू तिनलाई सम्पूर्ण रूपले परास्त गर्नेछौं,' उनले भने।
त्यसका लागि जनतालाई अधिकारसम्पन्न बनाएको अहिलेको संविधानलाई जनताले अझै बढी उपलब्धी हुनेगरी संविधान संसोधन गर्नुपर्ने बताए।
ती सबै आफ्नै जीवनकालमा हुने पनि प्रचण्डले बताए। र त्यहाँसम्म पुग्नका लागि शासकीय स्वरूप र निर्वाचत प्रणाली फेर्नुपर्ने उनले बताए।
'संविधानलाई उपयुक्त हुने शासकीय स्वरूप प्रत्यक्ष निर्वाचित राष्ट्रपति हो। त्यहाँ नपुगी राजनीतिक स्थायित्व र विकास दिन्छ। हामीलाई त्यहाँ पुग्नैपर्नेछ,' उनले भने।
अध्यक्ष प्रचण्डले कहिले कांग्रेससँग त कहिले एमालेसँग मिल्दा उनीहरूको रोग अलि अलि माओवादी केन्द्रमा पनि सरेको बताए। र त्यसैको 'डायग्नोसिस'का लागि जनताकहाँ पुगेको उनले बताए।
'धेरै रोग लागेर सिद्दिएकै त होइन तर सरूवा रोगचाहीँ हामीलाई लागेकै छ। साँच्चै रूपान्तरण भयौं भने जनताले उपचार गर्नेछन्,' उनले भने।
