नेपाली कांग्रेसका नेता मिनेन्द्र रिजालले पार्टीका प्रमुख सचेतक श्यामकुमार घिमिरेको भूमिकामाथि प्रश्न गरेका छन्।
नेपालमा पर्यटकको संख्या वृद्धि गर्न यौन व्यवसायलाई व्यवसायीकरण गर्नुपर्ने अभिव्यक्ति दिएका प्रमुख सचेतक घिमिरेले गत बुधबार प्रतिनिधि सभा बैठकमै माफी मागेका थिए।
यसतर्फ लक्ष्य गर्दै कांग्रेस नेता रिजालले शुक्रबार मोरङ-काठमाडौं सम्पर्क समितिले बत्तिसपुतलीमा गरेको कार्यक्रममा भने, ‘निर्वाचित सांसदको बोल्ने अधिकारका बारेमा म टिप्पणी गर्दिनँ। बोल्न पाइन्छ। तर बोल्दा नेपाली कांग्रेसको प्रमुख सचेतक पदबाट बिदा लिएर बोले हुन्थ्यो नि त।’
प्रमुख सचेतक पदबाट बिदा लिनु पर्दैन, माफी माफी मागेँ भन्ने हो भने भविष्यमा सबैले बोल्ने र माफी माग्दै हिँड्ने प्रवृत्तिको विकास हुने उनको भनाइ छ।
‘बोल्ने, चित्त बुझेन भने माफी माग्दै हिँड्ने, यो बाटोबाट हुँदैन। कांग्रेसको प्रमुख सचेतक छान्दा कस्तो व्यक्ति छानिएको रहेछ,’ घिमिरेसँग व्यक्तिगत सम्बन्ध राम्रो रहेको उल्लेख गर्दै रिजालले भने, ‘उहाँले पार्टीको गम्भीर विषय उठाएर बोल्नुपर्ने भयो भने फ्लोरबाट कसैले सोध्छ कि सोध्दैन तपाईंको विचार हो कि पार्टीको भनेर, भोलि माफी माग्नुहुन्छ कि माग्नुहुन्न भनेर सोध्यो भने त्यो प्रमुख सचेतकले कांग्रेसको काम बलियोसाथ सम्पादन गर्न सक्छ कि सक्दैन भनेर कांग्रेसले सोच्नु पर्दैन? मसँग नजिक छ भनेर जोगाउने?’
यो पनि:
जथाभाबी बोल्दा कांग्रेसभित्र मागियो प्रमुख सचेतकको राजीनामा, माफीपछि थमौती
