नागरिक उन्मुक्ति पार्टीको केन्द्रीय समिति बैठक शुक्रबार बस्ने भएको छ।
शुक्रबार बिहान ११ बजे मध्यबानेश्वर सनराइज क्याफेमा केन्द्रीय समिति बैठक बस्न लागेको हो।
अध्यक्ष रञ्जिता श्रेष्ठले केन्द्रीय समिति बैठकका लागि संस्थापक केन्द्रीय सदस्यहरूदेखि वहालवाला केन्द्रीय सदस्यहरूसम्मलाई अनिवार्य उपस्थित हुन भनेकी छन्।
जनमत पार्टीसँग एकताका लागि कार्यदल बनाउनेलगायत एजेन्डामाथि केन्द्रीय समितिमा छलफल हुने नेता गंगा चौधरीले सेतोपाटीलाई जानकारी दिए।
‘पार्टी एकीकरण गर्नेसम्बन्धी एजेन्डामा केन्द्रीय समितिमा छलफल हुन्छ, एकताका लागि कार्यदल बनाउँछौं,’ उनले भने।
नाउपामा ५ सय जना केन्द्रीय सदस्य छन्।
सिके राउत नेतृत्वको जनमत पार्टीले नाउपासँग एकता गर्न उपाध्यक्ष अब्दुल खानको नेतृत्वमा कार्यदल बनाइसकेको छ।
जनमत पार्टी र नाउपाबीच एकताका लागि जनमत अध्यक्ष सिके राउत र नाउपा अध्यक्ष रञ्जिता श्रेष्ठ तथा संरक्षक रेशम चौधरीबीच पटक पटक छलफल भएको थियो।
नाउपा अध्यक्ष श्रेष्ठले केन्द्रीय समितिबाट पार्टी एकताबारे निर्णय गरेर अघि बढ्नुपर्ने धारणा राखेपछि केन्द्रीय समिति बैठक बोलाइएको हो।
नाउपाबाट प्रतिनिधि सभामा ४ र जनमतबाट ६ जना सांसद छन्।
