युद्धविराम लम्ब्याउन हमास सहमत नभएको भन्दै इसराइले गजामा आक्रमण व्यापक बनाएपछि यमनबाट हुथी विद्रोहीले इसराइलमा मिसाइल प्रहार गरेको छ।
इरान समर्थित हुथीले बिहीबार बिहान राजधानी तेल अविभ लगायतका क्षेत्रमा लक्ष्य गरेर मिसाइल दागेको हो। हुथीले मिसाइल आक्रमण गरेपछि राजधानी लगायतका सहरहरूमा साइरन बजेको थियो।
यद्यपि हुथी मिसाइलहरूलाई इसराइली भूभागमा इसराइलको प्रतिरक्षा प्रणालीले आकाशमै नष्ट गरिदिएको अमेरिकी मिडिया सिएनएनले जनाएको छ। आक्रमणबाट कुनैपनि किसिमको क्षति नभएको पनि बताइएको छ।
हुथीले उक्त मिसाइलले तेल अविभको बेन गुरिअन अन्तर्राष्ट्रिय विमानस्थलमा लक्ष्य गरिएको बताएको छ।
यसअघि अमेरिकाले पनि यमनमा हुथी लक्षित कारबाही गरेको थियो। बुधबार र बिहीबार पनि यमनको राजधानी सानामा अमेरिकाले हवाइ आक्रमण गरेको थियो।
त्यसको जबाफमा पनि हुथीले इसराइलमा मिसाइल आक्रमण गरेको सिएनएनको समाचारमा उल्लेख छ।
त्यस्तै इसराइलले बिहीबारदेखि गजामा जमिनबाटै आक्रमण थालेको छ।
दुई दिनदेखि गजामा हवाइ आक्रमण गरिरहेको इसराइलले जमिनबाटै आक्रमण थालेको हो।
गजामा युद्धविराम लम्ब्याउन हमास सहमत नभएपछि इसराइलले पुनः आक्रमण थालेको हो।
इसराइल र हमासबीच माघ ५ गते तीन चरणको युद्धविराम हुनेगरी गजामा पहिलो चरणको युद्धविराम घोषणा भएको थियो।
४२ दिनपछि मध्यस्तकर्ताहरुले दोस्रो चरणको युद्धविरामका लागि सहमति जुटाउन नसकेपछि अमेरिकी अधिकारीहरूको प्रस्तावमा इसराइल गजामा थप ४२ दिनको पहिलो चरणकै युद्धविराम अवधी बढाउन सहमति भएको थियो।
तर हमासले भने दोस्रो चरणको युद्धविराम हुनुपर्ने माग राख्दै पहिलो चरणकै युद्धविराम लम्ब्याउने प्रस्तावालाई नकारिदिएको थियो।
त्यसपछि इसराइलल गजामा स-साना आक्रमण गर्दै आएको थियो। उसले गजामा मानवीय सहायताका सामग्रीहरू बोकेर गएका ट्रकहरूलाई सिमानामै रोकिदिएको थियो।
मंगलबारको आक्रमणले भने गजामा पुन इसराइलले आक्रमण सुरू गरेको आकलन गरिएको छ। यसले हमासको कब्जामा रहेका बन्धकहरुको आफन्तहरूमा ठूलो त्रास सिर्जन गरेको छ।
रोयटर्सका अनुसार हमासले २०२३ को अक्टोबरमा बन्धक बनाएर गजा पुर्याएको २४९ जनामध्ये अझै ५९ जना हमासकै कब्जामा छ।
