नेपाली कांग्रेसका सांसद जीवन परियारले सिरहाको औरही गाउँपालिका वडा नम्बर ५ मा विष्णु महायज्ञ गर्ने नाममा त्यहाँ बसोबास गरिरहेका डोम समुदायका व्यक्तिहरूलाई उठिवास गर्ने घटना भएको बताएका छन्।
प्रतिनिधि सभाको बिहीबारको बैठकमा बोल्दै कांग्रेस सहमहामन्त्रीसमेत रहेका परियारले गाउँपालिका अध्यक्ष र जनमत पार्टीका गाउँपालिका समिति अध्यक्षको संलग्नतामा डोम समुदायलाई उठिवास गर्ने काम भएको बताए।
‘औरही गाउँपालिका अध्यक्ष शिवजी यादव र जनमत पार्टीका गाउँपालिका अध्यक्ष दिलीप यादवसहितका व्यक्तिहरूले डोम समुदायका व्यक्तिहरूलाई उठिवास गर्ने काम भएकोमा घोर भर्त्सना गर्दछु,’ उनले भने।
मधेस प्रदेश सरकारले पाँच वर्षअघि डोम समुदायका लागि दुई कोठे घर निर्माण गरिदिएको थियो। ती भत्काएर उक्त ठाउँमा महायज्ञ सञ्चालन गर्न लागिएपछि विरोध भइरहेको छ।
