दाङ देउखुरीका दुई क्याम्पसको स्ववियु नतिजा सार्वजनिक भएको छ। एउटामा स्वतन्त्रको प्यालन र अर्कोमा एकीकृत समाजवादी निकट अखिलको प्यानल विजयी भएको छ।
लमहीस्थित देउखुरी बहुमुखी क्याम्पसको स्ववियु निर्वाचनमा स्वतन्त्र विद्यार्थीको क्लिन स्वीप गरेको छ।
‘स्वतन्त्र विद्यार्थी परिवार’का तर्फका उम्मेदवारी दिएका सबै उम्मेदवार निर्वाचित भएका हुन्। सभापति पदका उम्मेदवार मिलन चौधरी ४४६ मत प्राप्त गरी निर्वाचित भएका हुन्।
निकटतम प्रतिस्पर्धी अखिल संयुक्तका शम्भु जिसीले २५७ मत प्राप्त गरे। चौधरी जिसी भन्दा १८९ मत बढी प्राप्त गरी निर्वाचित भएका हुन्। शम्भुलाई अनेरास्ववियु, अनेरास्ववियु (क्रान्तिकारी) र एकीकृत समाजवादी पार्टीको अनेरास्ववियूको समर्थन थियो।
यहाँ नेपाली कांग्रेस निकट नेविसंघका राजन भुसाल तेस्रो भए। उनले २४२ मत प्राप्त गरेका थिए।
त्यस्तै सचिवमा अनुकुमारी यादव ३९९, कोषाध्यक्षमा आयुष्मा चौधरी ३६९ मत प्राप्त गरी निर्वाचित भए।
सदस्यहरूमा लक्ष्मीकुमारी यादव ३८९, सरिता पुन ४०८, आशिका चौधरी ४०५, सुदीप चौधरी ३९९, अनिलनाथ योगी ४००, कामना चौधरी ३९३ मत प्राप्त गरी निर्वाचित भएका हुन्।
त्यस्तै, देउखुरीकै राप्ती गाउँपालिका–२ लालमटियाको ऐरावती आदर्श बहुमुखी क्याम्पसमा विनोदकुमार सोनीको पुरै प्यानल विजय भएको छ। उनी माओवादी निकट विद्यार्थी संगठन अखिल (क्रान्तिकारी) का हुन्।
सोनीलाई नेकपा माओवादी केन्द्र र राष्ट्रिय जनमोर्चा निकट गठबन्धन (अखिल क्रान्तिकारी र अखिल छैटौं) को समर्थन थियो। सोनी २१४ मत प्राप्त गरी निर्वाचित भएका हुन्।
उनका निकटतम प्रतिस्पर्धी नेपाली कांग्रेसको भ्रातृ संगठन नेपाल विद्यार्थी संघका सभापति पदका उम्मेदवार प्रकाश पुनले १५८ मत प्राप्त गरेका थिए।
सचिव पदमा संयुक्त प्यानलका दीपक शर्मा १९३ मतसहित विजयी हुँदा नेविसंघका उम्मेदवार भुवन भट्टराईले १६५ मत प्राप्त गरे।
सचिवमा प्रकाश जेठारा ११५ मत प्राप्त गरेका थिए। त्यस्तै कोषाध्यक्षमा मन्दिप पोख्रेल १८९ मत प्राप्त गरी विजयी हुँदा निमराज गौतम १५२ र नेविसंघका निसम पोख्रेलले १३४ मत प्राप्त गरे। सदस्यतर्फ संयुक्त प्यालकै अनिल चौधरी १८३, मणिप्रसाद पौडेल १८८, भुपिन्द्र परियार १८६, सौरभ पोख्रेल १८८ र रविना कँवुरले १८३ मत प्राप्त गरी निर्वाचित भएका छन्।
राप्ती बबईमा नेविसंघको प्यानलको अग्रता
मंगलबार निर्वाचन भएका तीन क्याम्पस मध्ये जिल्लाको दोस्रो ठूलो क्याम्पस तुलसीपुरको राप्ती बबई क्याम्पसमा मतगणना जारी छ। हालसम्मको नतिजा अनुसार नेपाली कांग्रेसको भ्रातृ संगठन नेपाल विद्यार्थी संघ प्यानल सबैको अग्रता छ।
यो क्याम्पसमा नौं सय मत गणना भइसकेको छ। अब जम्मा ५१७ मत मात्रै गणना हुन बाँकी छ।
सार्वजनिक पछिल्लो मत परिणाम अनुसार स्ववियु सभापति पदमा नेविसंघका प्रमोद भण्डारी निकटतम प्रतिस्पर्धी भन्दा २०६ मतले अगाडि पुगेका छन्। भण्डारीले ४४८ मत प्राप्त गरेका छन्।
भण्डारीका निकटतम प्रतिस्पर्धी संयुक्त विद्यार्थी प्यानलका सभापति पदका उम्मेदवार लेखमणि खत्री (लक्ष्मण)ले २४२ मत प्राप्त गरेका छन्।
नौं सय मत गन्दा स्वतन्त्र उम्मेदवार दुई मध्य कोमलबहादुर वली (केबी) ले ९४ र कृष्ण केसी (डेभिड खत्री) ले २० मत मात्रै प्राप्त गरेका छन्।
सबै भन्दा पुरानो र ठूलो क्याम्पस दाङको घोराही भरतपुरस्थित महेन्द्र बहुमुखी क्याम्पस लगायत अन्यमा भने सर्वसम्मत रूपमा स्ववियु नेतृत्व चयन भएको थियो।
भरतपुर क्याम्पसमा नेपाल विद्यार्थी संघका दिपेश डिसी सर्वसम्मत रुपमा क्याम्पसको स्ववियु सभापति चयन भएका थिए।
जिल्लामा त्रिविबाट सम्बन्ध प्राप्त जिल्लामा २५ क्याम्पसहरू छन्। जसमध्ये नेपाल संस्कृत विश्व विद्यालय केन्द्रीय क्याम्पस बेलुझुण्डीका साथै मातहतका तीन क्याम्पसमा भने तालाबन्दीका कारण निर्वाचन हुन सकेन।
जनता विद्यापिठ बिजौरी र केन्द्रीय आर्युबेद कार्यालय (बाम्स) मा निर्वाचन हुन सकेन। केन्द्रीय क्याम्पस, जनता विद्यापिठमा नेकपा माओवादी केन्द्र निकट अखिल (कान्तिकारी) र बाम्समा नेकपा एमाले निकट अखिलले तालबान्दी गरेका कारण ती क्याम्पसहरूमा निर्वाचन हुन नसेकेको हो।
