विराटनगरका दुई क्याम्पसमा माओवादी निकट विद्यार्थी संगठन अखिल क्रान्तिकारीले सभापति जितेको छ।
मंगलबार भएको स्वतन्त्र विद्यार्थी युनियनको निर्वाचनमा विराटनगरको डिग्री क्याम्पस र विराटनगर नर्सिङ क्याम्पसको नेतृत्व अखिल क्रान्तिकारीले जितेको हो।
डिग्री क्याम्पसको सभापतिमा अखिल क्रान्तिकारीका प्रीतम साह निर्वाचित भएका छन्। एमाले निकट अनेरास्ववियुबाट एउटा सदस्यमा श्रुति घिमिरे निर्वाचित भएकी छन्।
त्यस्तै विराटनगर नर्सिङ क्याम्पसको सभापतिमा पनि अखिल क्रान्तिकारीका रोहित ताजपुरिया निर्वाचित भएका छन्।
नर्सिङ क्याम्पसको सचिवमा कांग्रेस निकट नेविसंघका सम्मान ढकाल निर्वाचित भएका छन्। कोषाध्यक्षमा एमाले निकट अनेरास्ववियुकी कृतिका कटुवाल निर्वाचित भएकी हुन्।
मोरङका ११ वटा क्याम्पसमा स्ववियु निर्वाचन भएको हो। जसमध्ये उर्लाबारी र पथरी बहुमुखी क्याम्पसमा मात्रै सर्वसम्मत भएको छ।
मोरङमा त्रिभुवन विश्वविद्यालयका ३ वटा आंगिक र ५ वटा सामुदायिक क्याम्पसमा मंगलबार स्ववियु निर्वाचन भएको थियो।
बेलबारी क्याम्पसमा भने चैत ९ गते निर्वाचन हुनेछ।
मोरङकै सुन्दरहरैंचास्थित सुकुना बहुमुखी क्याम्पसको स्ववियु सभापतिमा एमाले निकट विद्यार्थी संगठन अनेरास्ववियुका एलिस ओझा निर्वाचित भएका छन्। ओझाले २९९ मतान्तरका साथ नेविसंघका विजय ओझालाई पराजित गरेका हुन्।
एलिसले ९८५ मत प्राप्त गरे। पराजित बनेका विजयले ६८६ मत प्राप्त गरेको जनाइएको छ।
सुकुना क्याम्पसको कोषाध्यक्षमा भने नेविसंघका सविना थापा निर्वाचित भएकी छन्। बाँकी पदमा अनेरास्ववियुका उम्मेदवार निर्वाचित भएका छन। प्रत्यक्षतर्फका ८ र समानुपातिक १० सदस्यमा एलिसकै प्यानल निर्वाचित भएको हो।
३ हजार ६८२ जना विद्यार्थी मतदाता रहेको सुकुना क्याम्पसमा मंगलबार निर्वाचन सम्पन्न भएको थियो।–––
