कानुन व्यवसायीहरुको छाता संस्था नेपाल बार एशोसिएशनको निर्वाचन चैत २३ मा हुँदैछ।
बार चुनावका लागि सत्तारुढ एमाले र कांग्रेस निकट कानुन व्यवसायीहरुले राप्रपा निकट कानुन व्यवसायीहरुलाई पनि साथमा लिएर गठबन्धन बनाएका छन्।
राप्रपालाई साथमा लिएर बनेको सत्ता गठबन्धन निकट प्यानलसँग प्रतिस्पर्धा गर्न विपक्षी दलनिकट कानुन व्यवसायीले अर्को प्यानल बनाएका छन्।
विपक्षी प्यानलमा माओवादी केन्द्र, रास्वपा, एकीकृत समाजवादी दल निकट कानुन व्यवसायीहरु छन्।
नेपाली कांग्रेस निकट डेमोक्रेटिक लयर्स एशोसियशन (डीएलए), एमाले निकट प्रोग्रेसिभ प्रोफेसनल लयर्स एशोसियशन (पीपीएलए) र राप्रपा निकट राष्ट्रिय प्रजातान्त्रिक कानुन व्यवसायी संगठनले विजयप्रसाद मिश्रको नेतृत्वमा प्यानल निर्माण गरेका छन्। एमाले निकट पिपिएलएका केदार कोइराला यो प्यानलका महासचिव छन्।
विपक्षी मोर्चाको नेतृत्व माओवादी निकट रिपब्लिक लयर्स एशोसिएसन (आरपीएलए) ले गरेको छ। पूर्व महासचिव रमणकुमार श्रेष्ठको नेतृत्वमा बनेको यो प्यानलबाट रास्वपानिकट स्वतन्त्र कानुन व्यवसायी मञ्चका यज्ञमणि न्यौपाने महासचिवको उम्मेद्वार छन्। यो प्यानलमा समाजवादी पेशागत कानुन व्यवसायी संगठन (एसपीएलए) पनि सहभागी छ।
निर्वाचन समितिका सहसंयोजक एवम् प्रवक्तासेत रहेका वरिष्ठ अधिवक्ता ताराबहादुर सिटौलाले दिएको जानकारी अनुसार यसपटक बार चुनावमा ९ हजार ९९७ जना मतादाता छन्। उनीहरुले अध्यक्ष १ जना, उपाध्यक्ष ८ जना (महिलासहित), महासचिव १ जना, कोषाध्यक्ष १ र १४ जना सदस्य छान्नेछन्।
यसपटक अध्यक्षमा तीन जनाले स्वतन्त्र उम्मेद्वारी दिएका छन्। सत्तारुढ दल समर्थक र विपक्षी दल समर्थक एक–एक र तीन जना स्वतन्त्र गरी अध्यक्षमा पाँच जनाको उम्मेद्वारी छ।
आशिष पौडेल, राजु कैती र उज्जवल घिमिरेले अध्यक्षमा स्वतन्त्र उम्मेद्वारी दिएका हुन्। २५ पदका लागि बारमा ५७ जनाको उम्मेद्वारी परेको सिटौलाले जानकारी दिए।
उनका अनुसार काठमाडौंसहित देशका ३६ स्थानमा निर्वाचन केन्द्र हुने चुनावमा सबैभन्दा धेरै मतदाता उच्च अदालत पाटनमा छन्। २ हजार १०६ जना मतदाता पाटनमा छन् भने काठमाडौं जिल्ला अदालतमा १ हजार ९७४ मतदाता छन्।
