इसराइलले गजामा भीषण आक्रमण गरेको छ।
मंगलबार इसराइली आक्रमणबाट गजामा एकैदिन ४०० जनाको मृत्यु भएको छ।
गजामा युद्धविराम सुरू भएको माघ ५ गते यताकै ठूलो आक्रमण हो।
इसराइली प्रधानमन्त्री बेन्जामिन नेतन्याहूले हमासले युद्धविराम लम्ब्याउन अस्वीकार गरेका कारण आफूले आक्रमण गर्न निर्देशन दिएको बताएङ्का छन्।
उनले गजाका नागरिकहरूलाई सुरक्षित स्थानमा जान पनि निर्देशन दिएका छन्।
'इसराइलले हमासविरूद्ध अझै सशक्त ढंगले आक्रमण गर्नेछ। अब युद्धविराम र शान्तिको वार्ता सामान्य अवस्थामा होइन आक्रमणकै बीच हुनेछ,' किर्य सैनिक आधार शिविरबाट नेतन्याहुले भने।
हमासले इसराइली प्रहारको महुसस गरिसकेको पनि नेतन्याहुले बताएका छन्। 'यो त केबल सुरूवात मात्रै हो,' उनले भने।
अन्तर्राष्ट्रिय समाचार संस्था रोयटर्सका अनुसार इसराइलले गजाको उत्तरदेखि दक्षिणसम्मका घरहरू र पाल टाँगिएका शिविरहरूमा आक्रमण गरेको थियो। प्रत्यक्षदर्शीहरूले मंगलबार राति इजरायली विमानले गाजा शहरमा मिसाइल प्रहार गरेको बताएका छन्।
'त्यो नर्कको रात थियो। युद्धको पहिलो दिन जस्तै महसुस भयो,' गजाकी ६५ वर्षीया रबिहा जमालले रोयटर्ससँग भनेकी छन्।
इसराइल र हमासबीच माघ ५ गते तीन चरणको युद्धविराम हुनेगरी गजामा पहिलो चरणको युद्धविराम घोषणा भएको थियो।
४२ दिनपछि मध्यस्तकर्ताहरुले दोस्रो चरणको युद्धविरामका लागि सहमति जुटाउन नसकेपछि अमेरिकी अधिकारीहरूको प्रस्तावमा इसराइल गजामा थप ४२ दिनको पहिलो चरणकै युद्धविराम अवधी बढाउन सहमति भएको थियो।
तर हमासले भने दोस्रो चरणको युद्धविराम हुनुपर्ने माग राख्दै पहिलो चरणकै युद्धविराम लम्ब्याउने प्रस्तावालाई नकारिदिएको थियो।
त्यसपछि इसराइलल गजामा स-साना आक्रमण गर्दै आएको थियो। उसले गजामा मानवीय सहायताका सामग्रीहरू बोकेर गएका ट्रकहरूलाई सिमानामै रोकिदिएको थियो।
मंगलबारको आक्रमणले भने गजामा पुन इसराइलले आक्रमण सुरू गरेको आकलन गरिएको छ। यसले हमासको कब्जामा रहेका बन्धकहरुको आफन्तहरूमा ठूलो त्रास सिर्जन गरेको छ।
रोयटर्सका अनुसार हमासले २०२३ को अक्टोबरमा बन्धक बनाएर गजा पुर्याएको २४९ जनामध्ये अझै ५९ जना हमासकै कब्जामा छ।
