काठमाडौं विश्वविद्यालयका नवनियुक्त उपकुलपति प्रा.डा. अच्युुतप्रसाद वाग्लेले प्रधानमन्त्री एवं कुलपति केपी शर्मा ओलीसमक्ष पद तथा गोपनीयताको शपथ लिएका छन्।
प्रधानमन्त्री तथा मन्त्रिपरिषद्को कार्यालय सिंहदरबारमा मंगलबार भएको कार्यक्रममा उपकुलपति वाग्लेले शपथ लिएका हुन्।
कुलपति ओलीले विश्वविद्यालयको रिक्त उपकुलपति छनोटका लागि गठित खोज तथा सिफारिस समितिका संयोजक र सदस्यको सिफारिसमा परेका तीन जना मध्येबाट वाग्लेलाई विश्वविद्यालयको ऐन, २०४८ को दफा १३ (४) बमोजिम सोमबार उपकुलपति नियुक्त गरेका थिए।
शपथग्रहण कार्यक्रममा शिक्षा, विज्ञान तथा प्रविधिमन्त्री विद्या भट्टराई, प्रधानमन्त्रीका मुख्य सल्लाहकार विष्णुप्रसाद रिमाल, नेपाल सरकारका मुख्यसचिव एकनारायण अर्याल, शिक्षा मन्त्रालयका सचिव दीपक काफ्लेलगायत सहभागी थिए।
सो अवसरमा प्रधानमन्त्री ओलीले उपकुलपति नियुक्तिमा हुन पुगेको ढिलाइको सन्दर्भसमेतलाई ध्यान दिएर आगामी दिनमा सजगताका साथ सम्बन्धित सबै पक्षको साझा विश्वविद्यालय कायम राख्ने गरी काम अघि बढाउन आग्रह गरेका थिए।
वाग्लेले यसअघि केयूमा कार्यवाहक उपकुलपति र रजिष्ट्रार थिए।
