क्याम्पसमा तालाबन्दी भएपछि त्रिचन्द्र बहुमुखी क्याम्पसको स्वतन्त्र विद्यार्थी युनियन (स्ववियु) निर्वाचन स्थगित भएको छ।
मंगलबार हुने स्ववियु निर्वाचनको सम्पूर्ण तयारी पूरा भए पनि क्याम्पस प्रवेश गर्ने मुख्यद्वारमै तालाबन्दी भएकाले निर्वाचन स्थगित गरिएको निर्वाचन अधिकृत डा. अंगदमणि गौतमले जानकारी दिएका छन्।
निर्वाचनका निम्ति सबै उम्मेदवार प्रतिनिधिहरूसँग छलफल र परामर्श गरी अर्को मिति तय गरिने पनि उनले जनाएका छन्।
सोमबार बेलुकी निर्वाचन अधिकारी गौतमले जारी गरेको विज्ञप्तिमा भनिएको छ, 'यही मिति २०८१ चैत ५ गते यस त्रिचन्द्र बहुमुखी क्याम्पसमा हुने स्वतन्त्र विद्यार्थी युनियनको निर्वाचनका सम्पूर्ण तयारी पूरा भए पनि क्याम्पस प्रवेश गर्ने मुख्यद्वारमै तालाबन्दी भएर प्रतिकूल परिस्थिति सिर्जना भएकाले सबै उम्मेदवार प्रतिनिधिहरूसँगको छलफल र परामर्शमा अर्को मिति तय गर्ने गरी चैत ५ गतेको स्वतन्त्र विद्यार्थी युनियनको निर्वाचन स्थगित गरिएको बेहोरा सम्बद्ध सबैको जानकारीका लागि यो सूचना प्रकाशन गरिएको छ।'
