नेपाल प्रहरीका महानिरीक्षक (आइजिपी) बसन्तबहादुर कुँवरको कार्यकाल सकिएको छ।
आज मध्यरातिदेखि उनी ३० वर्षे कार्यकाल सकेर अवकाशमा जान लागेका हुन्।
२०७९ चैत १० गते बसेको मन्त्रिपरिषदको बैठकले उनलाई नेपाल प्रहरीको ३० औं प्रमुख बनाउने निर्णय भएको थियो।
दुई वर्षे कार्यकाल सकेर उनी अवकाशमा जाने भएका हुन्। उनी २०५१ चैत ५ गतेदेखि प्रहरी सेवामा प्रवेश गरेका थिए।
आइजिपी कुँवर पनि आफ्नो कार्यकालमा विवादमा तानिएका थिए। नक्कली भुटानी शरणार्थी प्रकरणको अनुसन्धान नगरी अभियुक्तलाई छाडेको आरोप उनीमाथि लागेको थियो।
उनकै ब्याचमेटहरू एआइजी टेकप्रसाद राई, बुद्धिराज गुरूङ, दुर्गा सिंह, कुवेर कडायत र जनक भट्टराई पनि अवकाशमा जानेछन्।
यस्तै एकैपटक आइजिपीसहित ६ जनाले अवकाश पाएसँगै अब प्रहरी प्रमुखको को बन्छन् भन्नेबारे चर्चा चलेको छ।
अहिले केन्द्रीय अनुसन्धान ब्युरो (सिआइबी) प्रमुख दीपक थापा, राष्ट्रिय प्रहरी प्रशिक्षण प्रतिष्ठानका प्रमुख सुदीप गिरी र काठमाडौं उपत्यका प्रहरी कार्यालय रानीपोखरीका प्रमुख टेक तामाङ प्रतिस्पर्धामा छन्।
उनीहरूमध्ये एक जना आइजिपी बन्नेछन्। सोमबार बस्ने मन्त्रिपरिषदको बैठकले प्रहरी प्रमुख चयन गर्ने तयारी छ।
प्रहरी नियमावली २०७१ अनुसार प्रहरी महानिरीक्षकको पदमा बढुवा गर्दा एआइजीहरूमध्येबाट ज्येष्ठता, कार्यकुशलता, कार्यक्षमता, उत्तरदायित्व बहन गर्न सक्ने क्षमता, नेतृत्व प्रदान गर्न सक्ने व्यक्तिलाई बढुवा गर्नुपर्ने उल्लेख गरेको छ।
आइजिपीलाई गृह मन्त्रालयले मन्त्रिपरिषदमा पेस गर्ने प्रावधान छ। त्यसअनुसार नै मन्त्रालयले मन्त्रिपरिषद बैठकमा पेस गर्नेछ।
‘आजको बैठकले आइजिपी को बन्छन् भनेर चयन गर्नेछन्,’ उनले भने, ‘तीन जना प्रतिस्पर्धामा छन्।’
-1742190611.jpg)
