तुलसीपुर खानेपानी उपभोक्ता तथा सरसफाई संस्थामा दोस्रो कार्यकालका लागि यमकान्त भण्डारी निर्वाचित भएका छन्। भण्डारी नेपाली कांग्रेसनिकटका हुन्। उनी दोस्रो कार्यकालका लागि समितिको अध्यक्ष निर्वाचित भएका हुन्।
खानेपानीमा तीन वर्षे कार्यकालका लागि नेतृत्व चुन्न शनिबार मतदान भएको थियो। पाँच पदाधिकारीसहित नौ सदस्यीय समितिमा दलीय प्रतिस्पर्धा देखिएको थियो।
खानेपानी सामाजिक र सेवामूलक संस्था भएपनि नेतृत्वका लागि भएको प्रतिस्पर्धा नियाल्दा कुनै संसदीय चुनावको भन्दा कम थिएन।
उम्मेदवारहरूले व्यापक रूपमा चुनावको प्रचार प्रसार गरे। टोल-टोलमा माइकिङ गरे। उम्मेदवारको प्रचारप्रसारमा सम्बन्धित दलका जिल्ला तहका नेताहरु र सम्बन्धित पार्टीबाट निर्वाचित जनप्रतिनिधिहरू पनि सहभागी भए।
तुलसीपुर खानेपानी संस्थामा यो वर्ष १० हजार ९१९ जना उपभोक्ताले मताधिकार पाएका थिए।
शनिबार बिहान ८ बजेदेखि बेलुका साढे ४ बजेसम्म अरनिको मैदानमा मतदान भएको थियो। निर्वाचनमा ७ हजार १ सय ८२ मत खसेको थियो। ३ हजार ७ सय २१ जना मतदाता भने मतदान गर्न आएनन् ।
सोमबार बिहान सकिएको मतगणनाको अन्तिम नतिजाअनुसार सचिव बाहेक कांग्रेसले सबै पदहरुमा एकलौटी जितेको छ।
निर्वाचन समितिका संयोजक प्रदीपकुमार धितालका अनुसार अध्यक्षमा निर्वाचित कांग्रेसका भण्डारीले २९६९ मत प्राप्त गर्दा निकटतम प्रतिस्पर्धी नेकपा माओवादी केन्द्रका उम्मेदवार सिताराम शर्माले २३८१ मत प्राप्त गरेका थिए।
अध्यक्षमा निर्वाचित भण्डारी निकटतम प्रतिस्पर्धी शर्मा भन्दा ५८८ मत बढी प्राप्त गरी निर्वाचित भएका हुन्। एमालेनिकट उम्मेदवार मनोज लामिछानेले १ हजार २१३ मत प्राप्त गरे।
लामिछानेले प्राप्त गरेको मत अध्यक्षमा निर्वाचित भण्डारी भन्दा १७५६ले कम हो। लामिछाने शर्मा भन्दा ११६८ मत कम प्राप्त गरेका छन्।
उपाध्यक्ष पदमा नेपाली कांग्रेसनिकट उम्मेदवार नारायणप्रसाद शर्मा २ हजार ७०६ मत प्राप्त गरी निर्वाचित भएका छन्।
उनका निकटतम प्रतिस्पर्धी राप्रपाका लक्ष्मण केसीले १ हजार ९०३ र अर्का प्रतिपस्पर्धी माओवादीका दुर्गाप्रसाद भण्डारीले १ हजार ४२० मत प्राप्त गरे। कांग्रेसका शर्माले राप्रका केसी भन्दा ८०३ र माओवादीका भण्डारीभन्दा १ हजार २८६ मत बढी मत प्राप्त गरी निर्वाचित भएका हुन्। निर्वाचनमा एमाले र राप्रपाको गठबन्धन थियो ।
सचिव पदमा भने नेकपा एमालेका भुवन भुसाल निर्वाचित भए । भुसालले २ हजार ४५१ मत प्राप्त गर्दा निकटतम प्रतिस्पर्धी नेपाली कांग्रेसका उम्मेदवार रञ्जनकुमार शर्माले २ हजार ४१३ मत प्राप्त गरे। यी दुई बीचको मतान्तर ३८ छ ।
मतगणनाको प्रारम्भिक नतिजामा भुसालको अग्रता थियो। त्यसपछि भने कांग्रेसका शर्माले अग्रता लिएका थिए। यी दुईबीचको रोचक प्रतिस्पर्धाका बीच अन्तिममा भुसाल झिनो मतान्तरले निर्वाचित भएका हुन्। सचिव पदका अर्का उम्मेदवार माओवादी केन्द्रका रुद्रबहादुर वलीले १०९५ मत प्राप्त गरे।
त्यस्तै कोषाध्यक्ष पदमा पनि नेपाली कांग्रेसकै भोलाप्रसाद थापा विजयी भए। थापाले निर्वाचनमै सबैभन्दा लोकप्रिय मत प्राप्त गरे । थापा ३ हजार २६८ मत प्राप्त गरी निर्वाचित भएका हुन्।
कोषाध्यक्ष पदमा एमालेकी सुशिला न्यौपानेले १ हजार ४२३ र माओवादीका कर्णबहादुर वलीले १ हजार २०६ मत प्राप्त गरे ।
थापा निकटतम प्रतिस्पर्धी न्यौपानेभन्दा १८४५ र माओवादीका वलीभन्दा २ हजार ६२ बढी मत प्राप्त गर्न सफल भए।
सदस्य तर्फका पाँचै सिट नेपाली काँग्रेसका उम्मेदवारले जितेका छन्। खुल्ला सदस्यतर्फ नेपाली कांग्रेसकै प्रमोदकुमार योगी (शरद) २५०७ र बुद्धिराम चौधरी २१२० मत प्राप्त गरी निर्वाचित भए। अन्य दलका उम्मेदवारहरुले आधा कम मत प्राप्त गरेका छन्।
त्यस्तै महिला सदस्य तर्फ सुष्मा अधिकारी २४५९ , लुमा बुढा मगर २ हजार ३८५ र शारदी सार्कीले २१४८ मत प्राप्त गरी निर्वाचित भएका हुन्।
तुलसीपुर खाने पानीमा पछिल्लो समय बबई नदीको पानी लिफ्टिङ गरी बजार ल्याउनका लागि धमाधम काम भइरहेको छ। झन्डै ५७ करोड लागतको योजनाका लागि पाइपलाइन बिच्छाउनेदेखि ठाउँ ठाउँमा ट्यांकी निर्माणको काम भइरहेको छ।
सबै तस्बिरः नारायण खड्का/सेतोपाटी।
