पोखरा महानगरपालिका वडा नम्बर २१ मा पोखरी मिचेर घर बनाउन नदिएको निहुँमा स्थानीय भूपेन्द्र गिरीले वडाध्यक्षमाथि रड प्रहार प्रयास गरेका छन्।
वडाध्यक्ष दीपक सुवेदीसहित जनप्रतिनिधि शनिबार नगर प्रहरीसहित पोखरी मिच्न नदिन गिरीले बनाइरहेका घर पुगेका थिए। नगर प्रहरीले पोखरीमाथि घर निर्माणकार्य रोक्न खोज्दा आफूलाई रड प्रहार गर्न खोजेको वडाध्यक्ष सुवेदीले बताए ।
‘हामीले एक हप्तादेखि पोखरी नमिच्नुस् भनेर सचेत गराएका थियौं, उहाँले अटेर गरेर पोखरीमाथि नै संरचना बनाउन थाल्नुभयो,’ उनले भने, ‘शनिबार नगर प्रहरीसहित हामी पुग्दा मलाई रडले हान्न खोज्नुभयो ।’
उनका अनुसार पोखरा २१ निर्मलपोखरीमा रहेको उक्त बाँझी पोखरी हिउँदमा गाई, भैंसीलाई पानी खुवाउन प्रयोग गरिन्थ्यो।
उक्त स्थानमा पानीको असुविधा भएका बेला पोखरी नै पानीको स्रोतका रुपमा रहेको थियो। पोखरी मिचेका गिरीले रड प्रहार गर्न लागेपछि वडाध्यक्ष सुवेदीसँगै रहेका स्थानीय श्रीराम सिग्देलले गिरीको हात समातेका थिए। त्यसपछि वडाध्यक्ष गिरीले पनि उनको हात समातेर रड प्रहारबाट जोगिएको उनले बताए।
आफूमाथि रड प्रहार भएको घटनाका विषयमा आइतबार उनले वडा प्रहरी कार्यालय बैदाममा निवेदन दिएका छन्। गिरीलाई कानुनी कारबाही माग गर्दै निवेदन दिएको उनले बताए। रड प्रहारको घटना भएपछि पनि प्रहरीले खोजखबर नगरेको उनको गुनासो छ।
पोखरा महानगरका मेयर धनराज आचार्यले उक्त घटनाको निन्दा गरेका छन्।
उनले महानगरभित्रका सार्वजनिक जग्गाको संरक्षण गर्ने अभियान चलाएको भन्दै सार्वजनिक सम्पत्तिको संरक्षणमा भूमिका खेल्न महानगरबासीलाई आग्रह गरेका छन्।
