नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड' ले समाजवादी मोर्चालाई सरकारमा जाने टेकोका रूपमा गठन नगरिएको बताएका छन्।
शनिबार काठमाडौंमा समाजवादी मोर्चाले गरेको पत्रकार सम्मेलनमा बोल्दै अध्यक्ष प्रचण्डले समाजवादी मोर्चालाई सरकारमा जाने टेकोका रूपमा बनाइएको भनेर गलत ब्याख्या गर्न खोजिएको बताएका हुन्।
'हामीले समाजवादी मोर्चा सोचे, सम्झेर बनाएको हो। पहिला उपेन्द्र यादव हुनुहुन्थ्यो, अदालतमा मुद्दा परेकाले अहिले हुनुहुन्न। अहिले महेन्द्र राय यादव हुनुहुन्छ। हामी चार पार्टी नै रहेका छौँ। यो प्रचण्डको लागि भन्ने जो पर्न गएको छ, त्यो गलत पर्न गएको छ। समाजवादी मोर्चा २५ गतेको कार्यक्रमपछि मात्रै बैठक बसेर कार्यक्रम घोषणा गरेका होइन,’ उनले भने।
उनले समाजवादी मोर्चालाई फागुन २५ गतेको राजावादीहरुको प्रदर्शनपछि मात्रै सक्रिय बनाइएको भन्नेकुरा गलत भएको बताए। यसअघि पनि आफूहरुले विभिन्न कार्यक्रम गरेको उनले बताए।
उनले संघीय लोकतान्त्रिक गणतन्त्रका पक्षधरहरुले एक पटक जनतासँग आफ्नो आत्समीक्षा गर्न आवश्यक रहेको बताए। त्यसकारण माओवादी केन्द्र पनि सोही उद्देश्य लिएर जनतासँग जोडिएको उनले बताए।
'हामी संघीय लोकतान्त्रिक गणतन्त्रका पक्षधरहरुले एक पटक जनतासँग आफ्नो आत्समीक्षा पनि जनतालाई राख्नुपर्ने महसुस गरेका छौं। के-के त्रुटी विगतमा भए भन्नुपर्ने हुन्छ, अघि कसरी जाने भन्नेकुरा जनतालाई भन्नका लागि राखिएको कार्यक्रम हो,' उनले भने। - न्युज एजेन्सी नेपाल
