समाजवादी मोर्चाको बैठक शुक्रबार बसेको छ।
नेकपा एकीकृत समाजवादीको केन्द्रीय कार्यालय आलोकनगरमा बिहान साढे ८ बजेदेखि झन्डै डेढ घन्टा मोर्चोको बैठक बसेको हो।
बैठकमा नेकपा (माओवादी केन्द्र) बाट अध्यक्ष पुष्पकमल दाहाल 'प्रचण्ड', वरिष्ठ उपाध्यक्ष नारायणकाजी श्रेष्ठ र महासचिव देव गुरूङ उपस्थित थिए।
नेकपा (एकीकृत समाजवादी)बाट वरिष्ठ नेता प्रमेश हमाल र महासचिव घनश्याम भूसाल उपस्थित थिए।
नेपाल कम्युनिस्ट पार्टीबाट महासचिव नेत्रिविक्रम चन्द 'विप्लव' र प्रवक्ता खड्गबहादुर विश्वकर्मा 'प्रकाण्ड' र नेता उमा भूजेल उपस्थित थिए।
नेपाल समाजवादी पार्टी (नेसपा)बाट अध्यक्ष महिन्द्र राय यादव र उपाध्यक्ष गंगानारायण श्रेष्ठ सहभागी थिए।
बैठकमा एकीकृत समाजवादीका अध्यक्ष भने उपस्थित थिएनन्।
बैठकमै सहभागी भएका नेकपाका प्रवक्ता प्रकाण्डले अध्यक्ष नेपाल बिरामी भएका कारण बैठकमा उपस्थित नभएको बताए।
एकीकृत समाजवादीका पोलिटब्युरो सदस्य मोहन गौतमले स्वास्थ्य असहज भएका कारण बैठकमा उपस्थित नभएको बताए।
'स्वास्थ्यमा सामान्य अहसज भएर घरमै आराम गरिराख्नुभएको छ,' उनले भने।
जसपा नेपालका अध्यक्ष उपेन्द्र यादव पनि मोर्चाको बैठकमा उपस्थित छैनन्। जसपा विभाजनपछि उनी बैठकमा आउन छाडेका हुन्। यद्यपि मोर्चामा समर्थन भने कायम राखेका छन्।
शुक्रबारको बैठकले तीन विषयमा छलफल र निर्णय गरेको छ।
पहिलो, समसामयिक राजनीतिक परिस्थिती, दोस्रो, यसअघि घोषित कार्यक्रमको व्यवस्थापन र आगामी कार्यक्रमबारे।
बैठकले समसामयिक राजनीतिक परिस्थिति प्रतिकूल भएको निष्कर्ष निकालेको नेकपाका नेता खड्गबहादुर विश्वकर्मा 'प्रकाण्ड'ले बताए।
आइतबार काठमाडौंमा पूर्वराजा ज्ञानेन्द्र शाहलाई स्वागत गर्न भनेर हजारौं मानिसहरू सडकमा उत्रिएका थिए। सो विषय गणतन्त्रवादी सबै राजनीतिक दलहरूले ध्यान आकर्षित गरेको थियो। संसदमा पनि यसबारेमा सांसदहरूले बोलेका थिए।
समाजवादी मोर्चाको बैठकमा पनि ती लगायत समग्र परिस्थितीबारे चर्चा भएको र यो अवस्था निकै प्रतिकूल भएको निष्कर्ष निकालिएको उनले बताए।
'त्यसले विशेषगरी गणतन्त्र, राष्ट्रियता र समाजवादको यात्रालाई चुनौती दिएको भन्ने निष्कर्ष रह्यो,' उनले भने।
समाजवादी मोर्चाले वर्तमान परिस्थितीको गाम्भीर्यता र समाधानका उपायहरूका बारेमा बुद्धिजिवी र नागरिक समाजसँग पनि अन्तर्क्रिया गर्ने निर्णय पनि गरेको नेता प्रकाण्डले बताए।
उनका अनुसार अन्तर्क्रिया भोलि बिहान ११ बजे ललितपुरको कुपन्डोलस्थित होटल हिमालयमा हुनेछ।
'जनताका विरूद्ध, स्वाधीनता र जनताका अधिकारका विरूद्धमा गणतन्त्र र समाजवादका विरूद्धमा भइरहेका षड्यन्त्र भइरहेका छन्। गडबढी गर्ने मानसिकताको पछिल्लो दिनमा भद्दा ढंगले देखिन थालेको छ। यही विषयमा केन्द्रीत गरेर अन्तर्क्रिया गर्ने लागेका हौं,' उनले भने।
भोलि दिउँसो तीन बजे वर्तमान परिस्थितको बारेमा जनतालाई सुसूचित गराउन पत्रकार सम्मेलन गर्ने निर्णय भएको पनि उनले बताए।
मोर्चाले चैत १५ गते काठमाडौंमा विरोध प्रदर्शन र विरोध सभा गर्दैछ। त्यसलाई सफल बनाउने विषयमा पनि छलफल भएको नेता प्रकाण्डले बताए।
