नेपाली कांग्रेसका महामन्त्री गगन थापाले भ्रष्टाचारको आहालमा डुबेको झुण्डले मुलुकका कुनै पनि समस्याको समाधान गर्न सक्दैन भन्ने नागरिकहरूलाई लागेको बताएका छन्।
नवलपरासी क्षेत्र नम्बर २ को प्रदेश सभा क्षेत्र १ मा पार्टीको क्षेत्रीय सम्मेलनलाई बुधबार सम्बोधन गर्दै महामन्त्री थापाले नेताहरू भ्रष्ट भएका छन् भन्ने नागरिकलाई लागेको बताएका हुन्।
‘नागरिकहरूलाई के लाग्न थालेको छ भने यो देशमा यति धेरै राजनीतिक दलहरू भ्रष्टाचारमा डुबेका छन्, नेताहरू भ्रष्ट भएका छन्, भ्रष्टाचारको आहालमा डुबेका अनैतिकहरूको झुण्डले हामीलाई कुनै पनि समाधान दिन सक्दैन भन्ने लागेको छ,’ उनले भने।
उनले व्यक्तिले भ्रष्टाचार गर्ने पनि बताए।
‘भ्रष्टाचार यदि कसैले गर्छ भने त्यसको जिम्मा त्यही व्यक्तिको हो,’ महामन्त्री थापाले भने, ‘मैले कुनै व्यक्तिगत लाभका निम्ति गल्ती गरेँ भने तपाईंले मलाई किन जोगाउने हो? त्यसको भारी पार्टीले किन बोक्ने हो? जसले केही गरेको छैन भने किन डराउने?’
उनले राज्यका निकायले गलत गर्नेमाथि अनुसन्धान गर्नुपर्ने बताए। सरकारी निकायले अनुसन्धान गरेकोमा चित्त नबुझेमा भने विकल्पमा जान सकिने उनको भनाइ छ।
‘अख्तियारले प्रधानमन्त्रीलाई पनि अनुसन्धान गर्न सक्छ, तर अख्तियारले पनि छानिछानि मुद्दा लगाउँछ भन्ने केहीको आरोप छ,’ उनले भने, ‘त्यहाँभित्र पनि विश्वास छैन पनि भनिरहेको सुनिन्छ। त्यसैले म भन्छु- नेपालमा भएका भ्रष्टाचारका ठूला काण्डका सन्दर्भमा संसदबाट उच्चस्तरीय छानबिन समिति बनाउने भए पनि बनाऔं। नेताको सम्पत्ति पनि छानबिन गरौं र सबै काण्डको छानबिन गरौं, गल्ती गरेको रहेछ भने आमा परे पनि मामा परे पनि पाता कसेर लैजाऔं।’
