नेपाल विद्यार्थी संघका तर्फबाट भन्दै विराटनगरस्थित महेन्द्र मोरङ कलेजमा उम्मेदवारी दर्ता गराएका उम्मेदवारलाई निर्वाचन समितिले ‘स्वतन्त्र’ पारिदिएको भन्दै आगजनी र तालाबन्दीको प्रयास भएको छ।
निर्वाचन समितिले नेविसंघको संस्थापन समूहलाई आधिकारिकता दिँदै शेखर कोइराला समर्थक समूहलाई स्वतन्त्र बनाएपछि विरोधमा बुधबार आगजनी र तालाबन्दी प्रयास भएको हो।
विद्यार्थीहरूले निर्वाचन कार्याल्यमा आगजनी प्रयास गरेका थिए भने तालाबन्दी पनि गरेका थिए। तर प्रहरीले ताला फोडेको छ।
चैत ५ गते हुने स्ववियु निर्वाचनका लागि कांग्रेस भ्रातृ संस्था नेपाल विद्यार्थी संघबाट संस्थापन पक्षबाट प्रज्वल विष्ट र कोइराला समूहबाट योगराज दाहालले उम्मेदवारी दिएका थिए।
मंगलबार राति सार्वजनिक उम्मेदवारको अन्तिम सूचीमा कोइराला समूहका उम्मेदवार दाहालको नाम स्वतन्त्र उम्मेदवारको सूचीमा थियो।
संगठनको उम्मेदवारलाई स्वतन्त्र उम्मेदवार बनाएको भन्दै नेविसंघ निर्वाचनको मुखैमा विभाजित भएको छ।
महेन्द्र मोरङको स्ववियु सभापति पदमा नेविसंघबाट प्रज्वल विष्ट, अनेरास्ववियुबाट अनिष बोगटी, अखिल क्रान्तिकारीबाट रोहित यादवलगायत उम्मेदवार छन्।
