प्रधानमन्त्री केपी शर्मा ओलीले मंगलबार कोशी प्रदेश सभालाई सम्बोधन गर्दैछन्।
प्रधानमन्त्रीले प्रदेश सभालाई सम्बोधन गर्ने कार्यक्रममा प्रदेशको मुख्य विपक्षी दल नेकपा माओवादी केन्द्रले भने बहिष्कार गर्ने चेतावनी दिएको छ।
प्रदेश सरकारले आफूहरूसित छलफल नगरेको भन्दै माओवादीले ‘यथास्थितिमा प्रधानमन्त्रीको सम्बोधनमा सहभागी नहुने’ बताएको छ।
‘अहिलेसम्म औपचारिक रूपमा कुनै खबर पनि आएको छैन, छलफल पनि भएको छैन,’ माओवादी केन्द्र कोशी संसदीय दलका नेता इन्द्र आङ्बोले भने, ‘विपक्षी दल सरकारको कारिन्दा होइन। मुख्यमन्त्रीले हामीले उठाएका गम्भीर सवालहरूको जबाफ दिनुभएको छैन। विपक्षी दलका नेताहरूले बोल्दा मुख्यमन्त्री प्रदेश सभामा अनुपस्थित रहने गर्नुभएको छ। हामी चाहिँ सरकारले बोलाउनासाथ लुरूक्क परेर प्रधानमन्त्रीको सम्बोधन सुन्न जाने कुरा हुँदैन। यथास्थितिमा हामी जाँदैनौं।’
‘यथास्थितिमा जाँदैनौं’ भन्नुको मतलब मुख्यमन्त्रीले के गरे चाहिँ प्रधानमन्त्रीको सम्बोधनमा सहभागी बन्नुहुन्छ त? सेतोपाटीको प्रश्नमा आङ्बोले भने, ‘हैन, यो ऊ भन्ने छैन। अहिलेसम्म छलफल र जानकारी छैन। उहाँहरूले बोलाउनासाथ लुरूलुरू गइन्न।’
कोशीका सभामुख अम्बरबहादुर विष्टले दिएको जानकारी अनुसार मंगलबार दिउँसो २ बजे प्रधानमन्त्री ओलीले प्रदेश सभालाई सम्बोधन गर्ने कार्यक्रम छ।
प्रधानमन्त्री ओली मंगलबार नै पूर्वाञ्चल विश्वविद्यालयको दिक्षान्त समारोहमा पनि सहभागी हुनेछन्।
