नेकपा (माओवादी केन्द्र) ले गणतन्त्र र संविधान रक्षाका लागि काठमाडौंमा प्रदर्शन गर्ने भएको छ।
सोमबार बसेको पदाधिकारी बैठकले आधारभूत विचार मिल्ने गणतन्त्र पक्षधरहरूको प्रदर्शन गर्ने निर्णय गरेको हो।
बैठकको मिति भने मंगलबार अपराह्न ४ बजे बस्ने पदाधिकारी बैठकले तय गर्ने सचिव देवेन्द्र पौडेलले जानकारी दिए।
‘हामीले काठमाडौंमा प्रदर्शन गर्ने निर्णय गरेका छौं,’ पौडेलले सेतोपाटीसँग भने, ‘कहिले र कसरी गर्ने भन्नेबारे सोमबार अपराह्न ४ बजे समाजवादी मोर्चा र भोलि फेरि पदाधिकारी बैठक बसेर निर्णय गर्नेछौं।’
उनका अनुसार बैठकमा आइतबार काठमाडौंमा राजावादीहरूले गरेको प्रदर्शनबारे समीक्षा भएको थियो। बैठकमा अध्यक्ष पुष्पकमल दाहाल 'प्रचण्ड'ले माओवादीको अगुवाइमा नै गणतन्त्र आएकाले रक्षा गर्ने काम पनि माओवादीकै भएको बताएका थिए।
उनले राजावादीहरूको आइतबारको कार्यक्रममा भारतको उत्तर प्रदेशका मुख्यमन्त्री योगी आदित्यनाथको तस्बिर पनि प्रदर्शन भएको विषय गम्भीर चिन्ताको विषय भएको बताएका थिए।
‘हिन्दुवादी र राजावादीको जुलुसमा उत्तर प्रदेशका मुख्यमन्त्रीको मुख्यमन्त्रीको फोटो देखियो। भारतको पनि सहभागिता हो भने विषय झन चिन्ताजनक छ,’ बैठकम अध्यक्ष प्रचण्डले भनेका थिए, ‘यसको सत्यतथ्य पनि पत्ता लगाउनुपर्छ।’
पूर्वराजा ज्ञानेन्द्र शाह आइतबार पोखराबाट काठमाडौं आएका थिए। चार्टर्ड विमानमा काठमाडौं आएका पूर्वराजा शाहलाई त्रिभुवन अन्तर्राष्ट्रिय विमानस्थल गेटबाट राप्रपा, राप्रपा नेपाललगायतका नेता तथा कार्यकर्ताहरूले स्वागत गरेका थिए।
