प्रधानमन्त्री केपी शर्मा ओलीले अस्थिरता जन्माउने र फाटो ल्याउने खालका खेलहरू हुन थालेको बताएका छन्।
संविधान निर्माणका बेला त्यस्ता खेलहरू भएको स्मरण गर्दै प्रधानमन्त्री ओलीले अहिले पनि त्यस्तै खेल हुन थालेको बताएका हुन्।
‘संविधान निर्माणबा बेला पनि अस्थिरता र फाटो ल्याउने खेलहरू भएका थिए, त्यसलाई हामीले पराजित गरेका थियौं,’ सुदूरपश्चिम प्रदेश सभाको आइतबारको बैठकमा सम्बोधन गर्दै प्रधानमन्त्री ओलीले भने, ‘फेरि त्यस्ता खेलहरू हुन थालेका छन्, ती कुरालाई सम्बोधन गर्नै पर्नेछ।’
यो पनि: काठमाडौंमा पूर्वराजालाई स्वागत (तस्बिरहरू)
उनले सबै राजनीतिक दलका नेताहरू अहिलेको संविधान र लोकतान्त्रिक प्रणालीका पक्षमा एक हुनुपर्ने बताए।
देशलाई प्रतिगमनतिर जान नदिनका लागि सरकारमा भएका वा नभएका राजनीतिक दलहरू एक आवाजमा उभिएको भन्दै प्रधानमन्त्री ओलीले धन्यवाद पनि दिए।
‘जसले अस्थिरता वा संविधानविपरीत कुरा गर्नुभएको छ, म सम्झाउन चाहन्छु- यो बाटो विकास रोक्ने खालको हो, जनतालाई भ्रममा पार्ने प्रयास हो,’ उनले भने, ‘कसैले केही प्राप्त गरिहाल्छु भन्ने सपना देखेको छ भने त्यो सपना नदेख्दा राम्रो।’
प्रधानमन्त्री ओलीले प्रजातन्त्र दिवसका बेला पूर्वराजाका कुरा सुनेर आफू छक्क परेको पनि बताए।
‘उहाँ त संविधानको पनि कुरा गर्नुहुन्न, कानुनको पनि कुरा गर्नुहुन्न। लोकतन्त्र, प्रणाली र प्रक्रियाको कुरा गर्नुहुन्न। मलाई साथ दिनुस्, म आउँछु देश बचाउँछु,’ प्रधानमन्त्री ओलीले पूर्वराजालाई लक्ष्य गर्दै भने, ‘देश के भएको छ? उहाँहरूका र उहाँहरूबाट प्रेरित यस्ता अराजक क्रियाकलापले देश अप्ठेरोमा पर्दैछ।’
मलाई साथ देऊ भनेर पूर्वराजाले के मागेको हो बुझ्न नसकेको पनि प्रधानमन्त्री ओलीले बताए।
‘के चुनावमा साथ माग्या कि भोट माग्या कि के मागेको? मलाई साथ देऊ, म आउँछु। कहाँ आउने उहाँ?,’ प्रधानमन्त्री ओलीले भने, ‘राजनीतिमा आउनुस् हामी स्वागत गर्छौं। अराजनीतिमा आउने कि राजनीतिमा आउने। राजनीतिमा आउने भए यु आर वेलकम। उम्मेवार हुनुहुन्छ र साथ माग्न पाउनु हुन्छ, केमा साथ मागेको तपाईंले बुझिएन, केमा साथ माग्नु भएको अहिले बुझिएन मात्रै भनौं।’
यस्ता कुरालाई साथ दिएर देशलाई फेरि पछाडि फर्काउने प्रयासहरू पनि देखिएको उनले बताए।
पूर्वराजालाई सिंहासनमा बसाउने हल्ला चलेको प्रसंग निकाल्दै प्रधानमन्त्री ओलीले भने, ‘आज पनि पूर्वराजालाई लगेर कहाँ सिंहासनमा बसाउने, नारायणहिटी छिराउने। के भन्या त्यो? कुनै कुर्सीमा लगेर राख्दा शासक हुन्छ मान्छे?,’ प्रधानमन्त्री ओलीले भने, ‘मानिदिनु परेन? अनि राष्ट्रपति रामचन्द्र पौडेललाई के गर्नु हुन्छ उहाँ एउटा कुर्सीमा बसेपछि। यो देशमा त चुनेको राष्ट्रपति छ, उहाँ के गर्नुहुन्छ?’
