नेकपा (माओवादी केन्द्र)को आज बस्ने भनिएको पदाधिकारी बैठक स्थगित भएको छ।
आइतबार दिउँसो ३ बजे बस्ने भनिएको पदाधिकारी बैठक स्थगित भएको माओवादी केन्द्रका महासचिव देव गुरूङले जानकारी दिए।
माओवादी केन्द्रका सबै पदाधिकारीहरू काठमाडौं आइनपुगेकाले बैठक सारिएको हो।
बैठक सोमबार बिहान ८ बजे बस्ने महासचिव गुरूङले जानकारी दिए।
बैठकमा चैतको ५ गतेका लागि तोकिएको स्ववियु निर्वाचनको तयारी, जागरण अभियानको अहिलेसम्मको समीक्षा, नेताहरूको जिम्मेवारी र समसामयिक राजनीतिबारे छलफल हुने उपमहासचिव वर्षमान पुनले जानकारी दिए।
‘अहिले हाम्रो जागरण अभियान मधेसकेन्द्रित छ। मधेसमा विशेष रूपमा मनाइने होली पर्व पनि सुरू भएको छ,’ उपमहासचिव पुनले सेतोपाटीसँग भने, ‘हुलाकी राजमार्गकेन्द्रित जागरण अभियान आधाजति सकिएकाले त्यसका बारेमा पनि समीक्षा गरौं भनेर केही दिनका लागि अभियान स्थगित गरिएको हो।’
उनले प्रचार गरिएजस्तो पूर्वराजाको सक्रियता बढेकाले अभियान स्थगित नगरिएको बताए।
फागुन १२ गतेदेखि झापाको कचनकवलबाट सुरू भएको जागरण अभियान आइतबार बारा, पर्सा र चितवनमा हुने तय थियो।
त्यसपछि क्रमश नवलपुर, नवलपरासी, रुपन्देही, कपिलवस्तु, दाङ, बर्दिया, बाँके, कैलाली र कञ्चनपुर बाँकी छ। होली लगत्तै फेरि अभियान सुरू हुने माओवादीले जनाएको छ।
