ऊर्जामन्त्री दीपक खड्काले बिहीबारको प्रतिनिधि सभा बैठकमा नेपाल विद्युत प्राधिकरणका कार्यकारी निर्देशकलाई स्पष्टीकरण सोध्नपर्नाका कारणहरूबारे जानकारी गराएका छन्।
बुधबारको प्रतिनिधि सभा बैठकमा प्रमुख प्रतिपक्षी नेकपा (माओवादी केन्द्र) सहित विपक्षी दलका सांसदहरूले घिसिङलाई पटक पटक ऊर्जा मन्त्रालयले स्पष्टीकरण सोधेको र कार्यसम्पादन मूल्याङ्कनमा पनि शून्य नम्बर दिएकोबारे सरकारको जबाफ माग गरेका थिए।
यसबारे सभामुख देवराज घिमिरेको रूलिङपछि ऊर्जामन्त्री खड्काले बिहीबारको बैठकमा विद्युत प्राधिकरणबारे उठेका विषयमा विस्तृतमा जानकारी गराएका छन्।
लोडसेडिङ अन्त्य गरेकोले समाजले घिसिङलाई नायकको उपाधि दिइरहेको पनि मन्त्री खड्काले बताए।
‘लोडसेडिङ अन्त्य कसरी भएको थियो पूर्वऊर्जामन्त्रीहरूलाई राम्रो ज्ञान छ,’ मन्त्री खड्काले भने, ‘लोडसेडिङको अन्त्य हुँदैगर्दा हामीहरूले भारतबाट चार सय ५० मेगावाट विद्युत आयत गरेका थियौं। तत्कालीन अवस्थामा नेपालको आवश्यकता ४२५ मेगावाटको थियो। हाम्रो आवश्यकता पूरा गरिदिएकोमा बरू भारतलाई धन्यवाद दिऔं।’
लोडसेडिङ अन्त्यको श्रेय भारतलाई जानुपर्ने पनि मन्त्री खड्काले बताए।
उनले अहिलेका प्रधानमन्त्री केपी शर्मा ओलीको नेतृत्वमा मन्त्रिपरिषदमै निर्णय भएर बिजुली खरिद गरिएको पनि उनले बताए।
‘लोडसेडिङ उहाँ (कुलमान घिसिङ) एक्लैले गरेको होइन,’ उनले भने, ‘उहाँले राम्रा गरेका काममा धन्यवाद दिन सकिन्छ।’
