संघीय संसद् अन्तर्गत् बिहीबार प्रतिनिधि सभाको बैठक बस्दैछ। आज दिउँसो सवा एक बजे बस्ने बैठकमा अध्यादेशहरू स्वीकृतिका लागि पेस गर्ने कार्यसूची रहेको संसद् सचिवालयले जानकारी दिएको छ।
सुशासन प्रवर्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने, आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, निजीकरण (पहिलो संशोधन), आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने, सहकारीसम्बन्धी केही नेपाल ऐनलाई संशोधन गर्ने अध्यादेश निर्णयार्थ प्रस्तुत गर्ने कार्यसूची रहेको संसद् सचिवालयले जानकारी दिएको छ।
यी अध्यादेश बुधबार प्रतिनिधि सभाबाट पारित भइसकेको छ।
सरकारले गत पुस २७ गते यी अध्यादेश जारी गरेको भए पनि संसदमा निर्णयार्थ प्रस्तुत गर्न सकेको थिएन। प्रतिनिधि सभामा सत्तापक्षसँग बहुमत भए पनि राष्ट्रिय सभामा जनता समाजवादी पार्टी नेपालको पनि साथ लिनुपर्थ्यो। जसपा नेपालले भूमिसम्बन्धी अध्यादेश फिर्ता लिनुपर्ने अडान राखेकाले सरकार अरू अध्यादेश पनि अगाडि बढाउन सकेको थिएन।
जसपा नेपालले बुधबार नै भूमिबाहेक पाँच अध्यादेशमा समर्थन गर्ने निर्णय गरेको छ।
भूमिसम्बन्धी अध्यादेशबारे अझै सहमति जुट्न सकेको छैन।
राष्ट्रिय सभामा आज प्रधानमन्त्री केपी शर्मा ओलीले अख्तियार दुरुपयोग अनुसन्धान आयोगको आर्थिक वर्ष २०८०/०८१ को वार्षिक प्रतिवेदन पेस गर्ने कार्यसूची छ।
स्वास्थ्य तथा जनसंख्या मन्त्री प्रदीप पौडेलसँग प्रश्नोत्तरको कार्यसूची पनि छ।
