नेकपा (एमाले) मोरङको दसौं अधिवेशनअन्तर्गत नयाँ नेतृत्वका लागि बुधबार भएको मतदानमा ८८८ मत खसेको छ।
निर्वाचन कमिटीले दिएको जानकारी अनुसार ९११ प्रतिनिधिहरुमध्ये ८८८ जनाले मतदान गरेका हुन्। मत गणना कतिबेला र कसरी सुरू गर्ने भन्ने विषयमा उम्मेदवारहरूसँग निर्वाचन कमिटीले छलफल गरिरहेको प्रमुख निर्वाचन अधिकृत सुरेशलाल श्रेष्ठले जानकारी दिए।
१६५ सदस्यीय नयाँ जिल्ला कमिटी चयनका लागि बिहान साढे नौ बजेदेखि मतदान भएको थियो। मतदान कार्य साँझ पौने ८ सम्म चलेको थियो।
विराटनगरमा जारी एमाले मोरङको १० औं अधिवेशनमा राजकुमार ओझा र अजम्बर राईको नेतृत्वमा दुइटा प्यानलले उम्मेदवारी दिएका छन्।
अध्यक्षका दुई उम्मेदवारमध्ये प्रदेश पूर्वसांसद ओझाले संस्थापन पक्षको प्रतिनिधित्व गर्छन्। उनलाई कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ।
अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ।
ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन्।
उपसचिवमा संस्थापन पक्षबाट उम्मेदवारी दिएकी शिल्पा निराला कार्की विराटनगर महानगरकी उपमेयर हुन्। उनी अन्तिम समयमा विनोद ढकाल समूह छाडेर संस्थापन समूहबाट उम्मेदवार बनेकी हुन्।
त्यस्तै, ढकाल समूहबाट अध्यक्ष अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तवा र उषा झाले उम्मेदवारी दिएका छन्। उषा झा जिसस मोरङकी उपप्रमुख हुन्।
पाँच पदाधिकारीसहित १६५ सदस्यीय कमिटीमा ७१ जना जिल्ला सदस्य निर्विरोध निर्वाचित भइसकेका छन्।
९४ पदका लागि १८१ जनाको उम्मेदवारी परेको छ।
प्रधानमन्त्री एवम् नेकपा ९एमाले० अध्यक्ष केपी शर्मा ओलीसहितका शीर्ष नेताहरूले प्यानल बनाएर चुनाव नलड्न दिएको निर्देशन अवज्ञा गर्दै मोरङमा दुइटा प्यानलले उम्मेदवारी दर्ता गराएका थिए।
ओलीले उपाध्यक्ष रामबहादुर थापा बादलमार्फत् चुनावी प्रतिस्पर्धा नगर्न, प्यानल बनाएर प्रतिस्पर्धा नगर्न सन्देश पठाएका थिए।
ओलीको निर्देशन उनकै समूहका नेताहरूले नै अवज्ञा गरेका छन्। सहमति गर्ने भन्दै आएको संस्थापन समूहले प्यानलसहितको उम्मेदवारी दर्ता गराएको छ। अर्को समूहले पनि त्यसै गरेको छ।
