नेकपा एमाले मोरङको विराटनगरमा जारी १० औं जिल्ला अधिवेशनमा ९११ जना प्रतिनिधि छन्। तीमध्ये ३४१ जना प्रतिनिधि उम्मेदवार बनेका छन्।
अधिवेशनमा उम्मेदवारी दिनेको लर्को लागेपछि एमाले नेताहरू सदस्य पदमा सहमति जुटाउन भन्दै उम्मेदवारी फिर्ता लिने समय थपेको थप्यै छन्।
कूल प्रतिनिधि संख्याको एक तिहाइभन्दा बढीले उम्मेदवारी दिएपछि निर्वाचन कमिटीलाई चुनाव गराउन सकस परेको छ।
निर्वाचन कमिटीले दिएको जानकारी अनुसार अध्यक्ष, उपाध्यक्ष, सचिव र २ जना उपसचिव सहितको पदाधिकारीमा हरेक पदमा दुई–दुई जनाको उम्मेदवारी परेको छ। यसरी ५ पदाधिकारीका लागि १० जनाको उम्मेदवारी परेको छ।
सदस्यमा भने धेरैले उम्मेदवारी दिएका छन्। १६० जना सदस्य पदका लागि ३३१ जनाले उम्मेदवारी दिएका छन्।
उम्मेदवारहरू धेरै जना भएपछि अहिले एमाले नेताहरू सदस्यहरूमा सर्वसम्मत गर्न पहल गरिरहेका छन्।
‘सबैको उम्मेदवारी कायम रहने हो भने मतपत्र नै १८ –२० पानाको बनाउनुपर्ने अवस्था छ,’ निर्वाचन कमिटीका एक सदस्यले भने, ‘त्यसैले सकेसम्म दुई तीन पानाको मतपत्र हुने गरी सर्वसम्मत गर्ने प्रयास भइरहेको छ।’
केन्द्रीय निर्वाचन कमिटीका सदस्य समिर नेपालले पनि छरितो मतपत्र बनाउनका लागि उम्मेदवारी फिर्ता गराउने विषयमा लचिलो नीति लिइएको बताए।
‘हामी निर्वाचनका अरू काम पनि गरिरहेका छौं,’ उनले भने, ‘अन्तिम नामावली प्रकाशनको समयसम्म उम्मेदवारी फिर्ता लिने विषयमा लचिलो हुन्छौं।’
एमाले मोरङमा जिल्ला नेतृत्व हात पार्न दुइटा प्यानल खडा भएका छन्। संस्थापन पक्ष राजकुमार ओझा नेतृत्वमा चुनावी मैदानमा होमिँदा इतर पक्ष (विनोद ढकाल पक्ष) अजम्बर राईको अगुवाइमा प्रतिस्पर्धामा ओर्लिएको छ।
अध्यक्षका दुई उम्मेदवारमध्ये प्रदेशका पूर्वसांसद ओझालाई कोशी प्रदेशबाट प्रतिनिधित्व गर्ने बहुसंख्यक स्थायी कमिटी सदस्यको साथ छ। अध्यक्षमै उम्मेदवार बनेका जिसस मोरङका प्रमुख अजम्बर राईलाई नेता विनोद ढकालको समर्थन छ।
ओझाको टिमबाट उपाध्यक्षमा शान्ति लिम्बू, सचिवमा रविन थापा, उपसचिवमा इर्जालाल राजवंशी र शिल्पा निराला कार्कीले उम्मेदवारी दिएका छन्। कार्की विराटनगरकी उपमेयर हुन्।
त्यस्तै, ढकाल समूहबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तवा र उषा झाले उम्मेदवारी दिएका छन्।
उषा झा जिसस मोरङकी उपप्रमुख हुन्। एमाले मोरङ जिल्ला कमिटी ५ पदाधिकारीसहित १६५ सदस्यीय हुनेछ।
सहमतिका लागि भन्दै उम्मेदवारी फिर्ताको समय थपिँदै जाँदा मंगलबार १ बजेदेखि सुरू हुने भनिएको मतदान झनै पछाडि धकेलिएको छ।
