मन्त्रिपरिषद्का पूर्वअध्यक्ष खिलराज रेग्मीले समाजलाई अनुशासित र चरित्रवान बनाउन नैतिक शिक्षा र सिकाइ पद्धति सुधार गर्नुपर्ने बताएका छन्।
सोमबार राष्ट्रपति कार्यालयमा आयोजित नरकान्त योग राष्ट्रिय पुरस्कार तथा भैरव सदाचार राष्ट्रिय पुरस्कार समर्पण कार्यक्रममा उनले यस्तो बताए।
उनले अरूलाई घोचपेच गरेर खुसी हुने प्रवृत्ति बढेको बताए।
उनले मानवता, नैतिक शिक्षा जस्ता विषयमा पठनपाठन गराउन छोडिएको भन्दै मानवीय शत्चरित्र र आदर्शका गुण हराउँदै गएकोप्रति चिन्ता व्यक्त गरे।
उनले भने, ‘आज सदाचार, नैतिकता र सदाचार जस्ता मानवीय सद्चरित्र जस्ता आदर्शका गुणहरू समाजमा ह्रासोन्मुख छन्। मानवता, नैतिकता र सद्चरित्र जस्ता विषयको सिकाइ र शिक्षाबारे राम्रो गहन अध्ययन गराउनै छोडियो। मानिसमा आफ्नो स्वार्थका लागि जे पनि गर्ने प्रवृत्ति बढ्दै गएको छ। अनुशासन, विनयशीलता र वाणिमा शालीनता हराउँदै गएको छ। अहंकार, दम्भ र कोभन्दा को कम भन्ने भावना बढेको पाइन्छ। अरूलाई घोचपेज गरेर खुसी हुने र त्यसैमा गर्व गर्ने प्रवृत्ति बढेको छ। त्यसैले व्यक्ति समाजलाई अनुशासित र चरित्रवान बनाउन नैतिक शिक्षा र सिकाइ पद्धति नै सुधारको आवश्यकता छ भन्ने मलाई लाग्दछ।’
कार्यक्रममा मन्त्रिपरिषद्का पूर्वअध्यक्ष रेग्मीलाई सर्वोदय सेवा संघले भैरव सदाचार राष्ट्रिय पुरस्कार २०८१ समर्पण गरेको थियो। –न्युज एजेन्सी नेपाल
