नेपाली कांग्रेसभित्र युवा र विज्ञको प्रतिनिधित्व सुनिश्चित गरिनुपर्ने आवाज उठेको छ।
नेता रंजित कर्णको अगुवाइमा हालै नगरकोटमा नेविसंघका २०६८-०७३ सम्मका पदाधिकारी लगायतको भेलाले युवा र विज्ञको प्रतिनिधित्व सुनिश्चित गर्न माग गरेको हो।
साथै उक्त भेलाले पार्टी संगठन सुदृढीकरणका लागि युवालाई ३० प्रतिशत र विज्ञलाई १० प्रतिशत प्रतिनिधित्व सुनिश्चित हुने व्यवस्था विधानमै गर्न पहल गर्नेसमेत निर्णय गरेको छ।
पार्टीले आयोजना गरेको न्यूनतम ३ वटा कार्यक्रममा सहभागी र १ वटा प्रशिक्षणमा सहभागी भएको मापदण्डका आधारमा सक्रिय सदस्यता वितरण गरी यसलाई थप जिम्मेवार बनाउनुपर्ने पनि उनीहरूको भनाइ छ।
४० वर्ष भित्रका युवाहरुलाई ३० र विज्ञका निम्ति १० प्रतिशतसम्मको प्रतिनिधित्वको सुनिश्चितता गराउन विधानमा नै व्यवस्था गरिनुपर्ने उनीहरूको भनाइ छ।
पार्टीको कार्यकारी पदमा उम्मेदवार दिनका निम्ति सम्पत्ति विवरण बुझाउन पर्ने विधानमा व्यवस्था गर्ने, वडा तहदेखि संसद सम्मको उम्मेदवार प्रस्तुत गर्न कार्यकालको कार्ययोजना अनिवार्य वैधानिक व्यवस्था गर्ने, समानुपातिक निर्वाचन प्रणाली हटाएर संसद संख्या कम गर्ने र उम्मेदवारीमा समावेशीलाई पूर्ण रुपमा लागु गर्ने गरी व्यवस्था मिलाउन संविधान संशोधनमा पहल गर्ने प्रतिबद्धता पनि उनीहरूको छ।
नेपाली कांग्रेसको नीति: उद्यमशीलता सहितको राजनीति अभियान सञ्चालन गर्ने र जुनसुकै तह र क्षेत्रमा उम्मेदवारी दिन कार्य योजना प्रस्तुत गर्ने बाध्यकारी व्यवस्था गर्ने र आरक्षणमा नदोहोरिने व्यवस्था मिलाउने उनीहरूको भनाइ छ।
