अमेरिकी राष्ट्रपति डोनाल्ड ट्रम्पले युक्रेनमा शान्तिका लागि त्यहाँका राष्ट्रपति भोलोदिमिर जेलेन्स्की तयार छैनन् भन्ने प्रष्ट भएको बताएका छन्।
शुक्रबार ह्वाइट हाउसमा चर्काचर्कीपछि विना निष्कर्ष टुंगिएको वार्तापछि सामाजिक सञ्जाल प्लेटफर्म एक्समार्फत वक्तव्य जारी गर्दै ट्रम्पले जेलेन्स्की शान्तिका लागि तयार नभएको बताएका हुन्।
उनले ह्वाइट हाउसको बैठक अर्थपूर्ण रहेको पनि बताएका छन्। साथै बैठकले धेरै कुरा सिकाएको पनि ट्रम्पले बताएका छन्।
उनले आवेग र आक्रोशित भएर छलफलको गहिराइमा पुग्न नसकिने भनेका छन्।
'जेलेन्स्की शान्तिका लागि तयार छैनन् भन्ने प्रष्ट भएको छ। अमेरिकाको संलग्न हुने वार्ताका लागि तयार छैनन् भन्ने देखिएको छ,' ट्रम्पले ट्रुथ सोसलमा लेखेका छन्।
उनले आफूलाई फाइदा नभई शान्ति चाहिएको पनि दोहोर्याए।
'उनले पवित्र ओभल अफिसमा अमेरिकालाई अनादर गरे। जतिबेला शान्तिका लागि तयार हुनेछन् त्यतिबेला फेरि ह्वाइट हाउस आउन सक्नेछन्,' ट्रप्पले लेखेका छन्।
शुक्रबार ओभल अफिसमा उपराष्ट्रपति जेडी भान्ससँग जेलेन्स्कीको चर्काचर्की भएको थियो। त्यसपछि भान्सले जेलेन्स्कीमाथि अमेरिका र ट्रम्पको अनादर गरेको आरोप लगाएका थिए।
जेलेन्स्की स्पष्टीकरण दिन थालेपछि ट्रम्पले हस्तक्षेप गर्दै उनलाई हैसियत नभएको नेता भनेका थिए। त्यसपछि चर्काचर्की बढ्न थालेपछि ट्रम्प र त्यहाँ उपस्थित ह्वाइट हाउसका अधिकारीहरुले युक्रेनी अधिकारीहरूलाई ह्वाइट हाउस छाड्न भनेका थिए।
ह्वाइट हाउसबाट निकालिएका जेलेन्स्की निराश भएर फर्किएका थिए।
ह्वाइट हाउसको घटनाले विश्वको ध्यान तानेको छ। युरोपेली नेताहरूले तत्काल त्यसको प्रतिक्रिया दिएर जेलेन्स्कीको समर्थन गरेका छन्।
अन्तर्राष्ट्रिय मिडियाहरूले ३ वर्षदेखि आफ्नो देशमा आक्रमण गर्ने रूस र त्यहाँका राष्ट्रपति भ्लादिमिर पुटिनको पक्षमा नलाग्न ट्रम्पलाई फकाउने अवसर जेलेन्स्कीले गुमाएको विश्लेषण गरेका छन्।
यो पनिः
ह्वाइट हाउसमा ट्रम्प, भान्स र जेलेन्स्कीबीच चर्काचर्की (भिडिओ)
चर्काचर्कीपछि ह्वाइट हाउस तुरून्त छाड्न जेलेन्स्कीलाई आदेश
ह्वाइट हाउसमा चर्काचर्कीपछि दर्जनौं युरोपेली नेताहरूको जेलेन्स्कीलाई समर्थन
