हमासले इसराइललाई एउटाको भनेर हस्तान्तरण गरेको शव अर्कैको रहेको खुलेको छ।
बिहीबार हमासले चार इसराइली बन्धकको शव हस्तान्तरण गरेको थियो।
३२ वर्षीय शिरी बिबस, उनकी चार वर्षकी छोरी एरियल र १० महिनाका छोरा केफिरसँगै ८४ वर्षका ओडेड लिफसिथको भनेर हमासले चार जनाको शव हस्तान्तरण गरेको थियो।
तर फरेन्सिक चेकजाँचका क्रममा शिरीको भनिएको शव उनको नरहेको खुलेको अन्तर्राष्ट्रिय सञ्चारमाध्यहरूले जनाएका छन्।
शव हस्तान्तरणपछि इसराइलले चार वटै शवको फरेन्सिक जाँच गरेको थियो। तीमध्ये तीन शवहरू जसको भनिएको हो उसैको रहेको तर दुई बच्चाकी आमा भनेर हस्तान्तरण गरिएको शव उनको नरहेको पाइएको इसराइली अखबार टाइम्स अफ इसराइलले जनाएको छ।
अमेरिकी सञ्चारमाध्यमा सिएनएनले पनि त्यो शव शिरिको नभएको भनेर इसराइली अधिकारीहरूलाई उद्धृत गर्दै लेखेको छ।इसराइलले शिरीको भनेर पहिचान नखुलेको शव पठाएको भनेर आपत्ति जनाएको छ। उनीहरूले शिरीको शव तत्काल पठाउन पनि चेतावनी दिएका छन्।
बिहीबार चारै शवको डिएनए परीक्षण गरिएको थियो। एक्सपर्टहरूले शिरीको भनिएको शव उनको नभएको बताएपछि आइडिएफले विज्ञप्ति जारी गरेर शिरीको शव फिर्ता गर्न भनेको हो।
शव बाँकी रहेका इसराइली बन्धकमध्ये कसैको पनि नभएको आइडिएफले जनाएको छ।
संयुक्त राष्ट्रसंघका लागि इसराइलका राजदूत ड्यानी डेननले हमासको बर्बरतापूर्ण कदमलाई राष्ट्रसंघमा रहेका सबै मुलुकहरूले निन्दा व्यक्त गर्नुपर्ने बताए। साथै त्यसो गरेर हमासले युद्धविरामको सम्झौता उल्लंघन गरेको पनि बताए। उनले तत्काल शिरीको शव फिर्ता गर्न पनि चेतावनी दिएका छन्।
