नेपाल विद्युत प्राधिकरणका कार्यकारी निर्देशक कुलमान घिसिङकै कारण लोडसेटिङ हटेजस्तो प्रचारबाजी गरिएको भन्दै ऊर्जा, जलस्रोत तथा सिँचाइमन्त्री दीपक खड्काले असन्तुष्टि पोखेका छन्।
संसदको मंगलबारको बैठकमा उनले आठ वर्षअघि लोडसेडिङ अन्त्य गर्न नेपाललाई साढे चार सय मेगावाट बिजुली चाहिएको र त्यसको आपूर्ति भारतबाट भएको बताए। त्यस निम्ति ट्रान्समिसन लाइन बनाउन केही वर्ष अघिदेखि काम हुँदै आएकाले लोडसेडिङ हटाएको जस कुलमान घिसिङलाई मात्र दिन नहुने उनको भनाइ थियो।
'आठ वर्षअघि लोडसेडिङ नगराउन नेपालको आवश्यकता साढे चार सय मेगावाटको थियो। त्यति बेला साढे चार सय मेगावाट बिजुली भारतबाट ल्याइयो। भारतबाट बिजुली ल्याउन ट्रान्समिसन लाइन त केही वर्ष अघिदेखि नै बन्नुपर्ने थियो होला नि!' मन्त्री खड्काले भने, 'त्यो ट्रान्समिसन लाइन कसका कारणले बनेको हो? यहाँ पूर्वमन्त्रीज्यूहरू हुनुहुन्छ, तपाईंहरू सबै जान्नुहुन्छ। अनि उहाँ कसरी उत्पात् देउता हुनुभयो? अचम्म लाग्छ!'
उनले अगाडि भने, 'उहाँले केही राम्रो काम गर्नुभयो होला, त्यसका लागि विश्लेषण गरेर उहाँलाई धन्यवाद, पुरस्कार के दिनुपर्छ दिऊँला। तर सञ्चालक समितिले निर्णय गर्छ, उहाँ कार्यान्वयन गर्नुहुन्न। सरकारलाई टेर्नुहुन्न। सय प्रतिशत लगानी सरकारको छ, उहाँ कर्मचारी भएर भाषण गर्दै हिँड्नुहुन्छ। तपाईंहरूले पनि उहाँको गतिविधि भोग्नुभएको छ। यस्ता अराजक गतिविधिलाई सरकारले सधैं हेरेर बस्ने कुरा हुँदैन। लगाम त लगाउनुपर्छ।'
एक कर्मचारीका विषयमा नेताहरूले यति धेरै प्रश्न उठाएकोमा पनि आफूलाई आश्चर्य लागेको मन्त्री खड्काले बताए।
