नेकपा एमालेका सांसद रघुजी पन्तले कांग्रेस र एमालेले चाहँदैमा चाहेअनुसारको संविधान संशोधन हुन नसक्ने बताएका छन्।
शनिबार ललितपुरमा आयोजित एक कार्यक्रममा उनले अध्यादेशकै विषयमा पनि कुनै पास हुने र कुनै पास नहुने स्थिति देखिएकाले दुई पार्टीले चाहँदैमा चाहेअनुसारको संविधान संशोधन हुन नसक्ने बताएका हुन्।
उनले संविधानमा रहेका असन्तुष्टिहरु अहिले आएर व्यक्त भइरहेको पनि बताए।
'यो संविधानलाई बचाउन पनि संशोधन आवश्यक छ। हामी रिफर्म भएनौँ भने जान्छौँ। समयानुसार परिवर्तन हुनुपर्छ। संविधान पनि त्यही हो। संविधान संशोधन त्यति साह्रै सहज पनि देखिरहेको छैन। कांग्रेस र एमालेले चाहँदैमा चाहेकै जसरी संविधान संशोधन अघि बढ्ला भन्नेकुरामा प्रश्न छ,' उनले भने।
तर कतिपय कुराहरु संशोधन गर्न सकिन्छ भनेर गर्ने भनेर लागिएको पनि उनले बताए।
'नेपालमा जुन संविधान संशोधन भएको छैन, त्यो संशोधन नभएको संविधान बाँचेको छैन अध्यादेशकै विषयलाई लिएर राष्ट्रिय सभाको कम्पोज्सिनलाई लिएर कुनै पास हुने र कुनै नहुने खालको स्थिति देखिएको छ। छलफल जरुरी र संशोधनको दिशातिर सर्वसहमतिले गर्ने भन्ने हो,’ उनले भने।
त्यसकारण संविधान संशोधनको बहस र छलफल आवश्यक रहेको उनले बताए। (न्युज एजेन्सी नेपाल)
