अमेरिकी राष्ट्रपति डोनाल्ड ट्रम्पको चेतावनीका बाबजुद हमासले शनिबार गजाबाट तिन जनामात्रै बन्धकलाई छाडेको छ।
राष्ट्रपति ट्रम्पले हमासले युद्ध-विराम सम्झौता अनुसार पहिलो चरणमा रिहा गर्ने भनिएका सबै बन्धक शनिबार सम्ममा नछोडे युद्ध-विराम तोडिने र गजामा विध्वंश मच्चिने चेतावनी दिएका थिए।
त्यसका बाबजुद हमासले शनिबार तीन पुरूषलाई बन्धकमुक्त गरेको छ। बन्धकमुक्त हुनेमध्ये एक जना अमेरिकी मूलकै पुरूष छन्।
यद्यपि हमासले आफ्नो अडानविपरीत शनिबार बन्धक छाडेको हो। उसले यसअघि इसराइलले युद्धविरामको सम्झौता उल्लंघन गरेको भनेर शनिबार बन्धक छाड्न ढिलो गर्ने भनेको थियो।
त्यसपछि ट्रम्पले एक कदम अघि बढेर पहिलो चरणमा छाड्ने भनिएको ३३ जनामध्ये बाँकी रहेका सबैलाई बन्धकमुक्त गर्न चेतावनी दिएका थिए।
ट्रम्पको अभिव्यक्तिपछि हौसिएका इसराइली प्रधानमन्त्री बेन्यामिन नेतन्याहूले पनि शनिबार समयमै बन्धक नछाडे गजामा सैनिक कारबाही गर्ने चेतावनी दिएका थिए।
त्यसका लागि सेनलाई गजाका सिमानामा तैनाथ रहन निर्देशनसमेत दिएका थिए।
शनिबार हमासले तीन बन्धक छाडेपछि ट्रम्पले ट्रुथ सोसलको आफ्नो अकाउन्टमार्फत प्रतिक्रिया दिएका छन्।
उनले गत हप्ता कसैलाई पनि नछाड्ने भनेकोमा शनिबार बन्धक छाड्नुले हमास सकारात्मक अवस्थामा रहेको देखिने बताएका छन्।
'सबै बन्धकको रिहा गर्नका लागि दिइएको राति १२ बजेको समयसीमाको बारेमा के गर्ने भनेर निर्णय इसराइलले गर्नेछ,' ट्रम्पले भनेका छन्।
त्यसमा इसराइलले जुन निर्णय लिएपनि अमेरिका उसको साथमा रहने प्रतिबद्धता ट्रम्पले व्यक्त गरेका छन्।
नेतन्याहुमाथि युद्धविराम तोड्ने अवस्था आउन नदिन इसराइलीहरूको दबाब छ।
हमासको घोषणा, ट्रम्पको अभिव्यक्ति र नेतन्याहूको चेतावनीपछि इसराइलभरि युद्धविराम भंग हुनसक्ने त्रास फैलिएको थियो।
त्यहाँका नागरिकहरूले आफ्नो देशका नागरिकहरूलाई सकुशल फिर्ता ल्याउने विषयमा सम्झौता नै गर्नुपरे पनि पछि हट्न नमिल्ने भन्दै नेतन्याहूविरूद्ध प्रदर्शन गरेका थिए।
अर्कातर्फ इजिप्ट र कतार युद्धविराम भंग हुन नदिन जोडबल गरिरहेको भनेर अन्तर्राष्ट्रिय समाचार संस्थाहरूले जनाएका छन्। शनिबार निर्धारित समयमै हमासले बन्धक मुक्त गर्नुमा पनि इजिप्ट र कतारी मध्यस्तकर्ताहरूको भूमिका रहेको बताइन्छ।
उनीहरूले चाँडै नै दोस्रो चरणको युद्धविरामको पहल थाल्ने पनि भनिएको छ।
