नेपाली कांग्रेसका प्रवक्तासमेत रहेका सांसद प्रकाशशरण महतले पार्टीको नेतृत्वका लागि आफू कुनैपनि कोणबाट कम नरहेको बताएका छन्।
शनिबार चितवनमा पत्रकारहरूसँगको कुराकानीमा महतले नेतृत्वका लागि आफूलाई अहिले जो-जो देखिएका छन् उनीहरूभन्दा कम नठान्ने बताएका हुन्।
'जहाँसम्म योग्यताको प्रश्न छ। जति पनि साथीभाई म म भनेर हिँड्नुभाछ, उनीहरूभन्दा कुनै पनि कोणबाट, कुनै पनि पृष्ठभूमीबाट कम मैले आफूलाई ठानेको छैन,' महतले भने।
तर महाधिवेशनका लागि अझै कम्तिमा दुई वर्ष समय रहेकाले नेतृत्वको दौड अहिल्यैदेखि लगाउन आवश्यक नरहेको उनले बताए।
नेतृत्व दौडमा आजैको मितिदेखि दौड लगाउनुपर्छ भन्ने पक्षमा छैन।
'चार वर्ष अवधि पूरा हुन झन्डै एक वर्ष बाँकी छ। एक वर्ष थप्ने प्रचलन नै भएको छ। त्यो भन्दा अगाडि अधिवेशन तयारी पनि पुग्दैन। कम्तिमा दुई वर्ष यसै छ। अहिल्यैदेखि म भनेर दौड किन लगाऔं?,' उनले भने।
महतले अहिलेको परिस्थितमा सबैलाई जोड्न सक्ने नेतृत्व आवश्यकता रहेको बताए।
'तर व्यक्तिगत महत्वाकांक्षाका लागि जे गरेपनि हुन्छ जे भनेपनि हुन्छ भन्ने संस्कार मेरो छैन। समय आएपछि भनिन्छ। योग्यताको हिसाबले कोही भन्दा कम छु भन्ने लाग्दैन,' उनले भने।
अहिलेको समय नेतृत्वका लागि दौडधुपभन्दा पार्टी निर्माणका लागि दौडधुप गर्न आवश्यक रहेको पनि महतले बताए।
'पार्टीलाई एकीकृत बनाउन दौड लगाउनुपर्छ। पार्टीभित्र सद्भाव वृद्धि गर्न दौड लगाउनुपर्छ। एक अर्कालाई स्वीकार गर्ने प्रवृत्ति विकास गर्न दौड लगाउनुपर्छ। अहिलेदेखि नै म भनेर दौड किन लगाउनु?,' उनले भने।
