अमेरिकी राष्ट्रपति डोनाल्ड ट्रम्पलाई संघीय कर्मचारी हटाउने योजनामा अदालतले बाटो खोलिदिएको छ।
बुधबार संघीय अदालतले संघीय कर्मचारीको आकार घटाउन ट्रम्प प्रशासनले अगाडि बढाएको प्रक्रियालाई निरन्तरता दिन अनुमति दिएको हो।
ट्रम्प प्रशासनले संघीय कर्मचारीहरूलाई स्वेच्छिक राजीनामा गर्न इमेलमार्फत सन्देश पठाएको थियो। त्यसरी राजीनामा गर्ने कर्मचारीले आगामी अक्टोबरसम्म तलब पाउने अफर पनि ट्रम्प प्रशासनले दिएको थियो।
कर्मचारीलाई निकाल्ने ट्रम्पको योजना अन्यायपूर्ण रहेको भन्दै त्यहाँका कर्मचारी युनियन अदालत पुगेको थियो। एक साताअघिको प्रारम्भिक सुनुवाइमा बोस्टनका संघीय जिल्ला न्यायाधीश जर्ज ओ टुलले उक्त ट्रम्प प्रशासनलाई उक्त निर्णय तत्काल कार्यान्वयन नगर्न आदेश दिएको छ।
बुधबार भएको सुनुवाइमा भने कर्मचारीलाई राजीनामा गराउने प्रक्रिया अगाडि बढाउन उनै न्यायाधीशले आदेश गरेको समाचार संस्था रोयटर्सले जनाएको छ।
ट्रम्प प्रशासनले भने राजीनामाका लागि नयाँ आवेदन रोकिएको जनाएको छ।
अदालतको उक्त आदेश गरेपनि कर्मचारी युनियनले संघीय कर्मचारीहरूलाई तत्काल राजीनामा नगर्न अनुरोध गरेको छ। युनियनलाई माथिल्लो अदालतमा अपिल गर्ने सुविधा अझै बाँकी रहनेछ।
ट्रम्प प्रशासनले यसअघि पठाएको इमेलमा करिब ६५ हजारभन्दा बढी कर्मचारीहरूले सहमति जनाएर जबाफ फर्काएका छन्।
बाँकीको मूल्यांकनका लागि संघीय एजेन्सीहरुलाई आफ्ना सल्लाहकार इलन मस्कसँग समन्वय गरी काम गर्न ट्रम्पले आदेश जारी गरिसकेका छन्।
बाँकी कर्मचारीको हकमा इलन मस्ककै समन्वयमा भएको मूल्यांकनको आधारमा हुने भनिएको छ।
ट्रम्पले विशेषगरी रिटायर्ड हुन लागेका, कार्यसम्पादनमा कमजोर भएका तथा डेमोक्र्याटिक पार्टीप्रति झुकाव भएका कर्मचारीलाई हटाउन लागेका हुन्।
