उपप्रधानमन्त्री तथा सहरी विकास मन्त्री प्रकाशमान सिंहले समस्यास्त आयोजनाहरूमा समाधान खोज्नुपर्नेमा जोड दिएका छन्।
मंगलबार सहरी विकास मन्त्रालय अन्तर्गतका कार्यालय प्रमुखहरूलाई बोलाएर उनले समस्याग्रस्त आयोजनाबारे चासो राखेको उनको सचिवालयले जनाएको छ।
आयोजनामा के कारणले समस्या देखिएको हो त्यसबारे पहिचान गरी तत्काल समाधान निकाल्नुपर्नेमा मन्त्री सिंहले जोड दिएका थिए।
छलफलमा सहरी विकास तथा भवन निर्माण विभागका महानिर्देशक मचाकाजी महर्जन र नयाँ सहर आयोजनाका निर्देशक एकराज अधिकारीले आफ्नो कार्यालय अन्तर्गतका आयोजनामा रहेका समस्या र चुनौतिबारे जानकारी गराएका थिए।
सो क्रममा उनीहरूले कतिपय आयोजनामा ठेकेदारले नियतवश काम नगर्दा समस्या देखिएको, केहीमा ठेकेदारले काम गरिरहँदा पनि केही प्राविधिक समस्या भएको र केही योजना भने अदालतमा मुद्दा परेकाले रोकिएको बताएका थिए।
समस्याग्रस्त आयोजनाबारे जानकारी लिएपछि उपप्रधानमन्त्री सिंहले कार्यान्वयनमा लैजान नसकिएका, ठेकेदारले काम लिएर कामै नगरेको र काम गर्दागर्दै पनि समस्या भएको आयोजना वर्गिकरण गरेर कानूनसम्मत समाधानको उपाय खोज्न आग्रह गरेका छन्।
मन्त्रालयले सहजीकरण गर्दा अघि बढ्न सक्ने योजना भए तत्काल त्यसका लागि आवश्यक काम थाल्न पनि विभाागिय प्रमुखलाई उनले ध्यानाकर्षण गराएका थिए।
उपप्रधानमन्त्री सिंहले विकास निर्माणका काम वर्षौसम्म अलपत्र पार्ने प्रवृत्ति निरुत्साहित गर्नुपर्ने बताए।
