नेपाल समाजवादी पार्टी (नयाँ शक्ति) को प्रथम महाधिवेशनमा बाबुराम भट्टराई र नेत्र चापागाईंबीच प्रतिस्पर्धा हुने भएको छ।
काठमाडौंमा जारी नेसपा (नयाँ शक्ति) को महाधिवेशनमा अध्यक्ष पदमा भट्टराई र चापागाईंले उम्मेदवारी दिएका हुन्।
नेसपा (नयाँ शक्ति) का नेता कृष्ण शर्माले अध्यक्ष पदमा भट्टराई र चापागाईंको उम्मेदवारी परेको जानकारी दिए। भट्टराई यसअघि पनि अध्यक्ष थिए।
चापागाईं भने नेसपा (नयाँ शक्ति) को भ्रातृ संगठन नेपाल समाजवादी विद्यार्थी युनियनको निवर्तमान अध्यक्ष हुन्। उनले शैक्षिक क्षेत्र सुधारका लागि काठमाडौं र सातै प्रदेश राजधानी पुगेर आन्दोलन तथा अभियान सञ्चालन गरेका थिए।
महासचिव पदमा तीन जनाबीच प्रतिस्पर्धा हुने भएको छ।
यसअघि संगठन विभाग प्रमुख सोनामसिंह स्याङ्तान, नेपाल समाजवादी आदिवासी जनजाति महासंघ प्रमुख जिएस गुरूङ र शिक्षा विज्ञान तथा प्रविधि विभाग प्रमुख रहेका राजु नेपालले महासचिवमा उम्मेदवारी दिएका छन्।
महाधिवेशनका लागि एक हजार पाँच सय जना महाधिवेशन प्रतिनिधि छन्।
कात्तिकमा पोखरामा भएको विधान अधिवेशनले निर्णय गरेअनुसार केन्द्रीय समिति ९९ सदस्यीय छ। यीमध्ये ८९ जना महाधिवेशनबाट निर्वाचित भई आउनुपर्ने र १० जना मनोनीत रहने व्यवस्था छ।
पार्टीमा ११ सदस्यीय पदाधिकारी रहनेछन्। एक अध्यक्ष, पाँच उपाध्यक्ष, एक महासचिव, तीन सचिव र एक जना कोषाध्यक्ष रहन्छन्।
उपाध्यक्ष महिलालगायत केही पदाधिकारी र केन्द्रीय सदस्य गरी २० जना निर्विरोध भइरहेका छन्।
यो पनि: नेसपा (नयाँ शक्ति) को उपाध्यक्ष भइन् मानुषी, २० जना निर्विरोध
