नेपाल समाजवादी पार्टी (नयाँ शक्ति) को प्रथम महाधिवेशनमा आइतबार अध्यक्ष बाबुराम भट्टराईले राजनीतिक तथा संगठनात्मक प्रस्ताव पेस गरेका छन्।
भट्टराईले नयाँ शक्ति र व्यक्तिहरूसँग संवाद तथा कार्यगत एकतालाई जोड दिएका छन्।
‘पुराना पतनशील र भ्रष्ट शक्तिहरूका विकल्पमा उदय भइरहेका विभिन्न नयाँ शक्ति र व्यक्तिहरूसँग संवाद, सहकार्य, कार्यगत एकता, संयुक्त मोर्चा गर्दै अन्ततः बृहत् वैकल्पिक शक्तिहरूको ध्रुवीकरणका निम्ति प्रयत्न तथा अगुवाइ गर्नुपर्छ,’ भट्टराईको प्रतिवेदनमा उल्लेख छ, ‘हाम्रो पार्टीको राजनीतिक संवाद समितिले यस सन्दर्भमा संकीर्णता, दलीय आग्रह र पूर्वाग्रहभन्दा माथि उठेर नयाँ र वैकल्पिक पार्टी समूह एवं व्यक्तिहरूसँग संवाद र सहकार्यको व्यवस्थित पहल गर्नेछ।’
उनले युगीन कार्यभार पूरा गर्ने वैकल्पिक राजनीतिक शक्तिको निर्माण एकैचोटि बनिबनाउ रूपमा वा रातारात नहुने पनि बताएका छन्।
‘वैकल्पिक शक्तिहरू विभिन्न रूपमा उदय हुन पनि सक्छन्। लामो समयको निर्माण र विनिर्माण, संघर्ष र ध्रुवीकरणको चरण पार गरेर मात्र भरपर्दो र दिगो वैकल्पिक राजनीतिक शक्ति निर्माण हुन सक्छ। त्यसैले हामीले कुनै अहंकार र एकलकाँटे प्रवृत्ति नबोकी तर आधारभूत मूल्यमान्यता र विचारमा दृढ भएर वैकल्पिक शक्तिहरूसँग सहकार्य गर्ने पहल गर्नुपर्छ,’ उनले भनेका छन्।
उनले वैकल्पिक राजनीति वर्तमान युगको अपरिहार्य आवश्यकता भएको बताएका छन्।
‘हामी आकस्मिकताले त्यसका वाहक हौं। हामीले वैकल्पिक राजनीतिक शक्ति निर्माण नगरे वा गर्न नसके युगले अर्को पात्र जन्माउनेछ तर संसार र नेपालको यो ऐतिहासिक घडीमा नयाँ वैकल्पिक राजनीतिक शक्ति निर्माणको विकल्प छैन,’ उनले भने, ‘वैकल्पिक राजनीतिक शक्तिको विकल्प अझै उन्नत वैकल्पिक शक्ति मात्र हुनसक्छ। अतः इतिहासको यो जिम्मेवारी हिम्मतका साथ बहन गरौं। नेसपा (नयाँ शक्ति) लाई नेपालको वैकल्पिक राजनीतिक शक्तिको भरपर्दो केन्द्रको रूपमा विकास गरौं।’
रूपान्तरणकारी राजनीति गर्ने पार्टीको संगठन सदैव सबै मुद्दामा सबै प्रकृतिका संघर्षहरू निम्ति तयार रहनुपर्ने उनको भनाइ छ।
‘स्वाधीनता, संघीयता, समावेशी लोकतन्त्र, सुशासन र समृद्धिका मुद्दामा सडक, सदन र सरकारका मोर्चाबाट निरन्तर संघर्ष गर्ने तयारी पार्टीले गर्नैपर्छ। त्यसनिम्ति तत्कालीन मुद्दा मिल्ने शक्तिहरूसँग कार्यगत एकता वा सहकार्य गर्नुपर्ने हुन्छ। आधारभूत सिद्धान्त, नीति, कार्यक्रम मिल्ने शक्तिहरूसँग दीर्घकालीन प्रकृतिको संयुक्त मोर्चा निर्माण हुनसक्छ,’ भट्टराईको भनाइ छ।
सत्ताको राजनीतिमा डुबेका पुराना शक्तिहरूसँग सहकार्य र मोर्चाबन्दी प्रत्युत्पादक हुने विगतका अनुभवहरूले पुष्टि गरिसकेको पनि भट्टराईले उल्लेख गरेका छन्।
‘यो स्थितिमा उदीयमान वैकल्पिक राजनीतिक शक्तिहरूसँग मुद्दाको आधारमा संवाद, सहमति, सहकार्य र मोर्चाबन्दी गर्दै भविष्यका सम्भावना र आवश्यकताका आधारमा बृहत् ध्रुवीकरण गर्ने ढोका खुला राख्नुपर्दछ। त्यस निम्ति युगीन चेतना बोकेको र स्पष्ट वैचारिक-राजनीतिक कार्यदिशा अंगिकार गर्दै आएको हाम्रो पार्टीको संगठन र जनाधार सबल र समृद्ध पार्नु अपरिहार्य छ,’ भट्टराईले पेस गरेको प्रतिवेदनमा उल्लेख छ।
साथै भट्टराईले विगतमा नयाँ शक्तिमा जोडिएका तर विभिन्न कारणले अन्यत्र मोडिएकाहरूलाई पनि घर फर्काउन पहल गर्ने उल्लेख गरेका छन्।
नेसपा (नयाँ शक्ति) को महाधिवेशन माघ २९ गतेसम्म चल्नेछ।
यस्तो छ अध्यक्ष भट्टराईको प्रतिवेदन;
