पूर्वराष्ट्रपति विद्यादेवी भण्डारीले संघीय संसदका दुई ठूला दल नेपाली कांग्रेस र नेकपा (एमाले) राजनीतिक स्थायित्व र आर्थिक प्रगति गर्ने भनेर लागिरहेको बताएकी छन्।
दुई ठूला दल मिलेर संघीय सरकार बनेकोले अहिले अनुकूल समय रहेको पनि उनले बताइन्।
‘अहिले अनुकूल समय पनि छ, सरकार पनि स्थायी भएर चलिरहेको छ। नत्र यहाँ त हामीलाई समस्या, तीन-तीन महिनामा सरकार फेरिएर एउटा काम गर्न खोज्यो कहिले पनि पाइला नै अगाडि नसर्ने परिस्थिति थियो, अहिले दुई वटा ठूला राजनीतिक दल मिलेर त्यसलाई स्थायित्व दिने, आर्थिक प्रगति गर्ने भनेर लागिरहनुभएको छ,’ अरूणोदय माध्यामिक विद्यालयको ६० औं वार्षिकोत्सवलाई सम्बोधन गर्दै पूर्वराष्ट्रपति भण्डारीले भनिन्, ‘मेरो त उहाँहरूलाई शुभकामना छ।’
उनले अब पनि काम गर्न सकिएन भने के उपाय गर्ने भन्ने चासो भने जनताका बीचमा रहेको बताएकी छन्।
नेपालको शिक्षा क्षेत्र बरालिएको महसुस हुन थालेको पनि उनले बताइन्। शिक्षा राष्ट्र निर्माणको मुल खम्बा हुनुपर्नेमा त्यसो हुन नसकिरहेको उनको भनाइ थियो।
माध्यामिक तह पास गरिसकेपछि विदेश अध्ययनका लागि विद्यार्थी जाने वातावरणलाई अन्त्य गर्न स्वदेशमै रोजगारीको अवसर सिर्जना गर्न सक्नुपर्ने उनले बताइन्।
(न्युज एजेन्सी नेपाल)
