प्रमुख प्रतिपक्षी दल नेतासमेत रहेका नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले बिहीबारको प्रतिनिधि सभा बैठकलाई सम्बोधन गरे।
बोल्न रोस्टममा पुग्नेबित्तिकै प्रचण्डले प्रधानमन्त्री केपी शर्मा ओली र संसदको सबैभन्दा ठूलो दल नेपाली कांग्रेसका सभापति शेरबहादुर देउवा उपस्थित नरहेको विषय राखेका थिए।
उनले आफू बोल्दै गर्दा प्रधानमन्त्री र कांग्रेस सभापति देउवा बैठकमा आउने विश्वास व्यक्त गरेका थिए। यदि नआए पनि कुनै माध्यमबाट बोलेका कुरा जानकारीमा रहने प्रचण्डको भनाइ थियो।
भिडिओ:
प्रचण्डले यति भन्दैगर्दा कांग्रेस सभापति देउवा भने प्रतिनिधि सभा बैठकमा आइपुगे। प्रचण्डले देउवालाई धन्यवाद पनि दिए।
तर प्रचण्डले लामो समय बोल्दा पनि प्रधानमन्त्री ओली प्रतिनिधि सभा बैठकमा उपस्थित भएनन्।
संसदमा प्रधानमन्त्रीले सम्बोधन गर्दा प्रमुख प्रतिपक्षी दल नेतालाई निम्त्याउने र प्रमुख प्रतिपक्षी दल नेता बोल्दा प्रधानमन्त्री पनि उपस्थित रहने प्रचलन छ। तर बिहीबार प्रतिपक्षी दल नेता बोल्दा प्रधानमन्त्री ओली प्रतिनिधि सभा बैठकमा देखिएनन्।
प्रधानमन्त्री ओली किन प्रतिनिधि सभा बैठकमा उपस्थित भएनन् त? हामीले यसबारे प्रधानमन्त्री ओलीको सचिवालयका सदस्यलाई सोधेका छौं।
प्रधानमन्त्री ओलीका प्रेसविज्ञ रामशरण बजगाईले प्रमुख प्रतिपक्षी दल नेता बोल्नेबारे औपचारिक जानकारी प्राप्त नभएको बताए।
‘प्रधानमन्त्रीले सम्बोधन गर्दा प्रमुख प्रतिपक्षी दल नेतालाई समय मिलाएर आउनुस् है भन्ने जानकारी गराइन्छ, बैठकमा निम्त्याउने गरिन्छ,’ उनले भने, ‘प्रमुख प्रतिपक्षी दल नेताले पनि सम्बोधन गर्ने दिन प्रधानमन्त्रीलाई समय म्यानेज गर्न भन्ने अभ्यास थियो, यसपालि त्यो भएन। कहिलेकाहीँ यस्तो भइहाल्छ।’
संसदमा बोल्दै प्रतिपक्षी दल नेता प्रचण्डले सरकारले ल्याएका अध्यादेशहरू र सामाजिक सञ्जालसम्बन्धी विधेयकको विरोध गरेका थिए।
‘प्रधानमन्त्री केपी ओलीजी विरोध त परको कुरा, रचनात्मक आलोचना पनि सहन सक्नुहुन्न। यो पटक-पटक प्रमाणित तथ्य हो। उहाँले सक्नुभयो भने सिंगो देशलाई आफ्नो पार्टी नेकपा (एमाले) जस्तै एकदमै प्रश्नमुक्त, एकदमै आलोचनामुक्त र खासमा एकदमै विवेकमुक्त बनाउन चाहनुहुन्छ,’ प्रचण्डले भने, ‘त्यसैले उहाँ अभिव्यक्ति स्वतन्त्रताको संवैधानिक हक र प्रेस स्वतन्त्रतालाई कुल्चन प्रयत्नरत हुनु म अनौठो मान्दिनँ,’ उनले भनेका थिए।
अध्यक्ष प्रचण्डको सचिवालयले गत माघ १८ गते संसदको हिउँदे अधिवेशन सुरू भएका दिन नै प्रचण्डले माघ २४ गतेको बैठकमा बोल्ने बताएका थिए।
यो पनि:
सभामुखलाई प्रचण्डको प्रश्न- अदालतले धरौटीमा छाडिसकेका रविको निलम्बन कति न्यायपूर्ण छ?
संसदमा प्रचण्ड: प्रश्न सोध्दै, आफै जबाफ दिँदै
सामाजिक सञ्जाल विधेयकमा प्रचण्डले मागे कांग्रेसको धारणा
भूमिसम्बन्धी अध्यादेश भूमाफियाको पक्षमा ल्याइएको होः प्रचण्ड
