प्रमुख प्रतिपक्षी दल नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' ले सरकारले राष्ट्रिय सभामा पेस गरेको सामाजिक सञ्जाल सञ्चालन, प्रयोग र नियमनसम्बन्धी विधेयकका प्रावधान आपत्तिजनक रहेको बताएका छन्।
उनले प्रधानमन्त्री केपी ओलीले विरोध, रचनात्मक आलोचना पनि सहन नसक्ने बताए।
‘उहाँले सक्नुभयो भने सिंगो देशलाई आफ्नो पार्टी नेकपा (एमाले) जस्तै एकदमै प्रश्नमुक्त, एकदमै आलोचनामुक्त र खासमा एकदमै विवेकमुक्त बनाउन चाहनुहुन्छ। त्यसैले उहाँ अभिव्यक्ति स्वतन्त्रताको संवैधानिक हक र प्रेस स्वतन्त्रतालाई कुल्चन प्रयत्नरत हुनु म अनौठो मान्दिनँ,’ सरकारले ल्याएको सामाजिक सञ्जाल विधेयकप्रति लक्ष्य गर्दै उनले भने।
प्रतिपक्षी दल नेता प्रचण्ड संसदमा बोल्दा प्रधानमन्त्री केपी शर्मा ओली भने उपस्थित थिएनन्।
प्रधानमन्त्रीका प्रमुख सल्लाहकारसमेत रहेका एमाले उपमहासचिव विष्णु रिमालले भने अध्यक्ष प्रचण्डलाई जबाफ फर्काएका छन्।
‘पूर्वप्रधानमन्त्री पुष्पकमल दहाल 'प्रचण्ड' को सम्बोधन सुन्दैछु। एउटा प्रश्न नि- आफू प्रधानमन्त्री हुँदा चर्चित सामाजिक सञ्जाल टिकटकमाथि जसले प्रतिबन्ध लगायो, उसैले सामाजिक सञ्जाल फुक्काफाल सञ्चालनको तर्क गर्ने?’
प्रचण्ड प्रधानमन्त्री हुँदा २०८० कात्तिक २७ गते नेपालमा टिकटक प्रतिबन्ध लगाउने निर्णय भएको थियो। केपी शर्मा ओली प्रधानमन्त्री बनेपछि गत भदौमा टिकटकमाथिको प्रतिबन्ध हटाउने निर्णय भएको थियो।
