जनता समाजवादी पार्टी (जसपा) नेपालको संसदीय दल बैठक बस्दैछ।
बिहान साढे ११ बजे सिंहदरबारस्थित संसदीय दल कार्यालयमा बैठक बस्ने जसपा नेपालका सांसद राजकिशोर यादवले जानकारी दिए।
बैठकले सरकारले ल्याएको अध्यादेशलाई समर्थन गर्ने कि नगर्ने भन्ने आधिकारिक निर्णय गर्नेछ।
जसपा नेपालले अध्यादेशबारे अध्ययन, छलफल तथा विश्लेषण गरी पार्टीको धारणा बनाउन सुझाव दिन राजकिशोर यादवको संयोजकत्वमा मृगेन्द्रकुमार सिंह यादव, खालिद सिद्धिकी, मनिष सुमन र शैलेन्द्र प्रसाद साह सदस्य रहनेगरी कार्यदल गठन गरेको थियो।
उक्त कार्यदलले अध्यादेशबारे बिहान ९ बजे दल नेता उपेन्द्र यादवलाई सुझाव बुझाउने छ।
सोही आधारमा संसदीय दल बैठकमा छलफल गरी आधिकारिक निर्णय गर्नेछ।
प्रतिनिधिसभामा कांग्रेस, एमाले लगायत सत्ता गठबन्धको बहुमत रहेकाले त्यहाँबाट अध्यादेश पारित हुन गाह्रो छैन। तर राष्ट्रिय सभामा भने जसपा निर्णायक देखिएको छ। यद्यपि जसपा अहिलेसम्म अध्यादेबारे अनिर्णित छ।
प्रधानमन्त्री केपी शर्मा ओली र कांग्रेस सभापति शेर बहादुर देउवाले जसपा अध्यक्ष उपेन्द्र यादवलाई अध्यादेशको पक्षमा उभिन अनुरोध गरेका थिए।
राष्ट्रिय सभामा जसपाको हाल राष्ट्रिय सभामा सत्तारूढ नेपाली कांग्रेसका १६, नेकपा एमालेका १० र लोकतान्त्रिक समाजवादी पार्टी लोसपाका १ सांसद छन्। राष्ट्रपतिबाट मनोनीत सांसद वामदेव गौतम र अञ्जान शाक्यले पनि सत्तारूढ गठबन्धनलाई साथ दिने देखिन्छ। यस्तोमा सत्तारूढ दलहरूसँग २९ मत हुन्छ। जबकि ५९ सदस्यीय राष्ट्रिय सभामा बहुमतका लागि ३० सांसद चाहिन्छ।
उपेन्द्र यादव नेतृत्वको जसपा नेपाल अहिलेसम्म राष्ट्रिय सभाको सत्तापक्षको सांसदकै लहरमा बस्दै आएको छ। उसका ३ सांसद छन्। उसले सरकारलाई साथ दिए अध्यादेश स्वीकृत हुनेछ।
अर्कोतर्फ राष्ट्रिय सभामा विपक्षी दल पनि मजबुत छन्। राष्ट्रिय सभामा विपक्षी दल नेकपा माओवादी केन्द्र सबभन्दा ठूलो दल हो। उसका १७ सांसद छन्। त्यस्तै विपक्षमा रहेको एकीकृत समाजवादी पार्टीको ८ र राष्ट्रिय जनमोर्चाको १ सांसद छन्। सबै जोड्दा २६ सांसद हुन्छन्।
उपेन्द्र यादवको पार्टीका ३ सांसदले पनि विपक्षमा मत दिने निर्णय गरे यो संख्या २९ पुग्छ। त्यस्तो अवस्थामा राष्ट्रिय सभाका अध्यक्षको मत निर्णायक हुनेछ।
