राष्ट्रिय स्वतन्त्र पार्टी (रास्वपा) का सभापति रवि लामिछानेले चितवन जिल्ला अदालतमा प्रहरीलाई दिएकै जस्तो इन्कारी बयान दिएका छन्।
उनले प्रहरीलाई साहारा चितवन बहुउद्देश्यीय सहकारी संस्थाको बचत रकम अपचलनमा आफ्नो कुनै संलग्नता नरहेको बयान दिएका थिए। बुधबार अदालतमा उपस्थित भएर पनि त्यस्तै बयान दिएको स्रोतले बतायो।
बयान क्रममा रविले भनेका थिए, 'एउटै कुरा कति पटक भन्नु, कति ठाउँमा यही कुरा दोहोर्याउनु, मेरा कुरा उही हुन्! पोखरा, रूपन्देही, काठमाडौंमा जे भनेँ, त्यही हो। उही कुरा भन्दा भन्दा दिक्क लागिसक्यो।'
करिब साढे ३ घण्टाको बयानपछि सुरू भएको थुनछेक बहसमा सुरूमा सरकारी वकिलको तर्फबाट जिल्ला न्यायाधिवक्ता रवि न्यौपाने, सहायक न्यायाधीवक्ताहरू अमृत सुवेदी र बुद्धबहादुर थापाले बहस गरेका थिए। उनीहरूले साहारा चितवन सहकारीको बचत रकम अपचलनमा रवि संलग्न देखिएकाले अभियोगपत्रमा दाबी गरिएजस्तै सजाय माग गरेका थिए।
त्यसपछि जाहेरवाला (सहकारी पीडित) को तर्फबाट अधिवक्ता रमेश काफ्लेको बहस गरेका थिए। रवि कानुन बमोजिम गोरखा मिडिया नेटवर्क प्रालिको सेयर सदस्य रहेकाले नाफा हुँदा हक राख्ने भएकाले दायित्व पनि त्यति नै रहने काफ्लेले जिकिर गरेका थिए। रवि प्रबन्ध निर्देशक पनि रहेकाले यसमा 'मैले थाहा पाइनँ, जानिनँ' भन्न नमिल्ने पनि उनले बताएका थिए।
'काटिएका चेकको परिचालन पनि रविले गरेको देखिएको, सहकारीबाट गोरखा मिडिया, आफू हुँदै श्रीमती (निकिता पौडेल), गोपिकृष्ण मुभिजको नाममा पनि पुगेको देखियो। सहकारीको रकम परिवार र आफन्तसम्म पुर्याउने माध्यम उहाँ नै बनेको देखिन्छ,' काफ्लेले भनेका थिए, 'यो काम एक्लै भएको छैन। ठगी जस्ता यस्ता अपराधहरू कि समूहमा नै हुने गर्छन् र एक अर्का नमिलिकन भएको त छैन। त्यसकारण सबैको भूमिका एक आपसमा अन्तरसम्बन्धित छ। संगठित रूपमै भएका छन्। त्यसकारण कानुन बमोजिम हुनुपर्छ।'
उनको बहस सकिँदा अपराह्न सवा ५ बजिसकेको थियो। त्यसपछि न्यायाधीश दयाराम ढकालले बुधबारका लागि थुनछेक बहस सकिएको जानकारी गराए लगत्तै प्रदिवादीतर्फका वरिष्ठ अधिवक्ता सुशील पन्त उठेर रविलाई परिवारको जिम्मा लगाएर छाडिदिन आग्रह गरेका थिए।
'भोलि उहाँ आफै हाजिर हुनुहुन्छ। आज परिवारको जिम्मा लगाएर छाडिदिऔं,' उनले भनेका थिए।
तर न्यायाधीशले उनको कुरा इन्कार गरे। लगत्तै रवि उठेर बोले। उनले रूपन्देहीमा परिवारको जिम्मा लगाएर छाडिएको नजिर भएकाले यहाँ पनि त्यही गरिदिन आग्रह गरेका थिए।
'श्रीमानले यो नजिर बस्छ, उहाँलाई परिवारको जिम्मा लगाएपछि अरूलाई पनि त्यही गर्नुपर्छ, यो मिल्दैन भन्नुभयो,' स्रोतले भन्यो।
त्यसपछि न्यायाधीश ढकालले थुनछेक बहस नसकिएको हुँदा जाहेरवाला र प्रतिवादीको तर्फबाट बहसपैरवी र थुनछेक गर्न बिहीबार १० बजे उपस्थित गराउने गरी सुरक्षाकर्मीको जिम्मा लगाई रविलाई जिल्ला प्रहरी कार्यालय पठाइएको जानकारी गराए।
सामान्यतया थुनछेक बहस नसकिँदासम्म प्रतिवादीलाई प्रहरीको जिम्मा लगाउने नजिर रहेको जिल्ला अदालतका स्रेस्तेदार विष्णुप्रसाद आचार्य बताउँछन्।
'रूपन्देहीमा थुनछेक बहस नसकिँदै परिवारको जिम्मा लगाएर छाडिएका कारण यहाँ पनि त्यसो गरिन्छ कि भनेर सोचिएको हुनसक्छ,' उनले भने, 'थुनछेक बहस नसकिँदासम्म प्रहरीको जिम्मा लगाउनु सामान्य प्रक्रिया हो।'
