नेपाली कांग्रेसले पोखरामा मंगलबारदेखि जिल्ला सभापति र प्रशिक्षण विभाग प्रमुखलाई प्रशिक्षण सुरू गरेको छ।
सभापति शेरबहादुर देउवाले प्रशिक्षण कार्यक्रम उद्घाटन गरे।
उद्घाटन मञ्चमा सभापति देउवा र उपसभापति पूर्णबहादुर खड्का मात्रै थिए। जबकि कार्यक्रम हलभित्र पार्टीका अरू पदाधिकारीहरू, संघीय सरकारका मन्त्रीहरू, गण्डकी कांग्रेस सभापतिसहित पदाधिकारी, गण्डकीका मुख्यमन्त्री सुरेन्द्रराज पाण्डेलगायत पनि सरिक थिए।
फ्लोरमा बसेका कांग्रेसका पदाधिकारी। तस्बिर: सभापति देउवाको सचिवालय
कांग्रेसका कार्यक्रममा प्राय: मञ्चभरि नेताहरू र लम्बेतान भाषण हुने गर्छ। यसपालि फरक दृश्य देखियो।
मञ्चमा किन दुई जनामात्रै नेता राखेर कार्यक्रम भयो, यो कुरा हामीले कांग्रेस प्रचार विभाग प्रमुख मीनबहादुर विश्वकर्मालाई सोध्यौं।
उनले जबाफ दिए- यो पार्टीको नीतिअनुसार नै हो।
७७ जिल्ला सभापतिलाई प्रशिक्षण दिने कार्यक्रमको आयोजक केन्द्रीय नीति, अनुसन्धान प्रशिक्षण प्रतिष्ठान हो। उपसभापति पूर्णबहादुर खड्का प्रतिष्ठान प्रमुख छन्।
प्रशिक्षण उद्घाटन गर्ने प्रमुख अतिथि सभापति देउवा थिए। प्रतिष्ठान प्रमुख खड्का र सभापति देउवामात्रै मञ्चमा, अरू फ्लोरमा बसेर कांग्रेसले प्रशिक्षण कार्यक्रम गरिराखेको छ। बुधबारसम्म यो कार्यक्रम चल्छ।
प्रचार विभाग प्रमुख विश्वकर्माका अनुसार पार्टीले आफ्ना कार्यक्रम छोटो, छिटो र छरितो बनाउन खोजेको हो।
‘मञ्चमा आसनग्रहण पनि धेरै नगराउने, खादामालाको प्रयोग कम गर्ने र उद्घाटन समारोह सकभर आधा घन्टामा टुंग्याउने भन्ने पार्टीले अहिले नीति लिएको छ,’ प्रचार विभाग प्रमुख विश्वकर्माले सेतोपाटीसँग भने।
प्रशिक्षण कार्यक्रममा मञ्चमा नेताहरू नबस्ने उनको भनाइ छ। उद्घाटनका बेला दुई जना नेता मञ्चमा देखिए पनि उद्घाटन पछि फ्लोरमै बसेका छन्।
‘सभापति र प्रशिक्षण प्रतिष्ठानका प्रमुखलाई मात्रै मञ्चमा राखेर उद्घाटन सत्र गरिएको हो,’ उनले भने, ‘अरूले फ्लोरबाटै कार्यक्रममा सहभागीता जनाउनुभयो।’
उनकाअनुसार पार्टीले गर्ने अबदेखिका कार्यक्रममा सकेसम्म कम मानिसलाई मञ्चमा राखिनेछ। कांग्रेसले यो कुरा सर्कुलर पनि गरिसकेको छ।
‘मञ्चमा पाँच जनाभन्दा बढी नराख्ने त्यसमा कम्तीमा एक महिलासहित समावेशी हुनुपर्ने भनिएको छ,’ उनले भने।
प्रमुख अतिथि, कार्यक्रमका सभापति, उपसभापतिले स्वागत गर्ने, कुनै पनि पदको वरिष्ठ महिला र सञ्चालक गरेर पाँच जना मात्रै मञ्चमा राख्न पाइने उनले जानकारी दिए।
‘कहिलेकाहीँ एक/डेढ सय मानिस नै मञ्चमा देखिन्छ, अब त्यस्तो हुँदैन,’ उनले भने, ‘सबैभन्दा राम्रो मञ्चमा कम मानिस राख्ने र भाषण पनि थोरै समयमै सक्नु हो।’
पहिले पनि थियो यस्तो अभ्यास
कांग्रेसले २०७६ सालमा पनि ब्याच प्रतिबन्ध र आसन तथा भाषण छरितो गर्न सर्कुलर गरेको थियो।
त्यसबेला केन्द्रदेखि टोलसम्म पार्टीले आयोजना गर्ने कार्यक्रममा ब्याच लगाउन प्रतिबन्ध गरिएको थियो। वरपिपल, समी वा यस्तै विरूवामा पानी राखेर कार्यक्रम उद्घाटन गर्ने वा दीप प्रज्वलन गर्न कांग्रेसको सर्कुलर थियो।
आसन ग्रहण र भाषणलाई पनि छरितो बनाएर कांग्रेसले केन्द्रबाटै कार्यक्रमको डिजाइनसमेत पठाएको थियो। तर त्यसलाई व्यवहारमा लागु गरेको देखिएको थिएन।
तत्कालीन प्रवक्ता विश्वप्रकाश शर्माले पार्टीले आयोजना गर्ने कार्यक्रममा सभापति र प्रमुख वक्ता (प्रमुख अतिथि) लाई मञ्चमा र अरूलाई फ्लोरमा सामूहिक आसनग्रहण गराउने कार्यक्रमको डिजाइन पठाइएको बताएका थिए।
तर पार्टी केन्द्रका यस्ता सर्कुलर संगठन सुदृढीकरण अभियान र प्रशिक्षणजस्ता कार्यक्रममा व्यवहारमा लागु भए पनि आमसभाजस्ता कार्यक्रममा भने पालना भएको देखिँदैन।
