उपेन्द्र यादव नेतृत्वको जनता समाजवादी पार्टी नेपालले गठन गरेको कार्यदलले अध्यादेशबारे छलफल सुरू गरेको छ।
सरकारले माघ १८ मा संसदमा पेस गरेको अध्यादेशको पक्ष वा विपक्षमा उभिने भन्ने निर्णय गर्नुअघि जसपा नेपालले अध्यादेशका अन्तरवस्तुबारे सरोकारवाला पक्षहरूसँग छलफल गर्न कार्यदल बनाएको थियो।
माघ २४ गते प्रतिनिधि सभा र राष्ट्रिय सभामा अध्यादेश निर्णयार्थ पेस गर्ने तयारी छ।
प्रतिनिधि सभामा सत्तारूढ नेपाली कांग्रेस र नेकपा (एमाले) को मात्रै पनि बहुमत भएकोले प्रतिनिधि सभाबाट अध्यादेश स्वीकृत हुनेछ।
तर राष्ट्रिय सभामा सत्तारूढ कांग्रेस-एमाले-लोसपाको मात्रै बहुमत पुग्दैन। ५९ सदस्यीय राष्ट्रिय सभामा बहुमतका लागि ३० जना सांसद चाहिन्छ। यहाँ सत्ता पक्षको २८ जना मात्रै सांसद छन्।
यसका लागि जनता समाजवादी पार्टी नेपाल निर्णायक छ। राष्ट्रिय सभामा जसपा नेपालका ३ जना सांसद छन्।
जसपा नेपालका अध्यक्ष उपेन्द्र यादवले पार्टीको सोमबारको बैठकले राजकिशोर यादवको अध्यक्षतामा कार्यदल बनाएको र उक्त कार्यदलले मंगलबार विज्ञहरूसँग छलफल गर्ने बताए।
‘सबै कुरा राखेर दफाबार छलफल गरेपछि अध्यादेशको पक्षमा जाने कि विपक्षमा जाने भन्ने निर्णय हुन्छ,’ उनले भने। जसपा नेपालले सरकारले ल्याएको अध्यादेशको पक्षमा उभिने कि विपक्षमा भन्ने निर्णय बुधबारसम्म गरिसक्नेछ।
यो पनि: उपेन्द्र यादवलाई प्रश्न- अध्यादेश के गर्नुहुन्छ?
