ताप्लेजुङको पाथीभरा (मुक्कुमलुङ) तनावबारे सरकारी वार्ता टोली र आन्दोलनकारीको वार्ता टोलीबीच काठमाडौंमा संवाद सुरू भएको छ।
केबलकार निर्माणको विरोध गरिरहेका आन्दोलनकारीका तर्फबाट गठित वार्ता टोली संयोजक अमर तुम्याहाङले दिएको जानकारी अनुसार अहिले काठमाडौंको एक होटलमा दुई टोलीबीच छलफल चलिरहेको छ।
सरकारी वार्ता टोलीको नेतृत्व गृह मन्त्रालयका सहसचिव प्रेमप्रसाद भट्टराईले गरेका छन्।
‘अहिले हामी सरकारी वार्ता टोलीसँग छलफलमै छौं’, तुम्याहाङले सेतोपाटीसँग भने, ‘वार्ता चलिरहेको छ।’
सरकारले आइतबार गृह मन्त्रालयका सहसचिव प्रेमप्रसाद भट्टराईको नेतृत्वमा वार्ता समिति गठन गरेपछि आन्दोलनकारीका तर्फबाट ‘मुक्कुमलुङ संरक्षक संस्थाका तर्फबाट वार्ता समिति गठन गरेको जानकारी सोमबार सार्वजनिक गरेको थियो।
आन्दोलनकारीका वार्ता संयोजक अमर तुम्याहाङ उपत्यकामा बसेर प्राध्यापन गरिरहेका व्यक्ति हुन्। उनी माओवादीको ताप्लेजुङ जिल्ला कमिटी सदस्य हुन्। वार्ता टोलीमा राम मादेन र सरु सिङ्घक आदिबासी, जनजाति अभियन्ता हुन् भने शंकर सुब्बा पनि उपत्यकामै बसेर वकालत गरिरहेका कानुन व्यवसायी हुन्।
पाथीभरामा केबलकार निर्माणको विषयलाई लिएर विवाद जारी छ।
ताप्लेजुङको प्रसिद्ध धार्मिकस्थल पाथीभरामा केबलकार निर्माणको काम अघि बढेपछि त्यसको विरोधमा उत्रिएको ‘नो केबुलकार’ समूह र प्रहरीबीच अघिल्लो शनिबार भएको झडपमा प्रहरी र प्रदर्शनकारी घाइते भएका थिए।
झडपका क्रममा गोली लागेको भनिएका दुई आन्दोलनकारीसहित तीन जनालाई आइतबार विराटनगर विमानस्थलबाट नेपाली सेनाको स्काई ट्रकमार्फत थप उपचारका लागि काठमाडौं लगिएको थियो।
गएको शनिबार बेलुका ६ बजेपछि भएको झडपमा कम्तिमा १९ प्रहरी घाइते भएका थिए।
उक्त घटनामा तेह्रथुमको म्याङलुङबजारका ३६ वर्षीय यामबहादुर लिम्बूको तिघ्रा र पाँचथरको मिक्लाजुङका १८ वर्षीय सगुन लावतीको कुममा प्रहरीले चलाएको गोली लागेको थियो।
झडपका क्रममा भिरबाट लडेका ताप्लेजुङ बस्ने धर्म पालुङ्वाको कुम (ब्यूटी बोन) मा चोट लागेका कारण उनी पनि गम्भीर छन्।
फुङ्लिङ नगरपालिका–११ मा केबुलकारको संरचना निर्माण कार्य सुरू भएपछि घरेलु हातहतियारसहित ठूलो संख्यामा रहेको आन्दोलनकारी समूहले बलजफ्ती गरेको र खटिएका प्रहरी अधिकृतहरूमाथि समेत अन्धाधुन्ध आक्रमण गरेको प्रहरीको दाबी थियो।
आन्दोलनकारी पक्षले भने आफूमाथि बल प्रयोग भएपछि झडपको अवस्था बनेको दाबी गरेका थिए।
सोही घटनाको विरोधमा आन्दोलनरत विभिन्न संघसंस्थाहरूले मेची राजमार्ग र तमोर करिडोरको सडकमा अनिश्चितकालका लागि यातायात बन्दको घोषणा गरेका छन्। वार्ताबाट शान्तिपूर्ण समाधान निकाल्न तयार रहेको बताए पनि समितिले बन्द फिर्ता भने लिएको छैन।
-1738572055.jpeg)
