उपप्रधानमन्त्री एवम् अर्थमन्त्री विष्णु पौडेलले आफूमा ढाल्ने सामर्थ्य नभएकाहरुले नै सरकार ढल्छ भन्दै हिँडेको बताएका छन्।
आइतबार पत्रकार महासंघ रुपन्देहीको नवनिर्वाचित नेतृत्वसँग छलफल कार्यक्रममा उनले अहिलेको सरकारले मुलुकलाई अप्ठ्यारो परिस्थितिमा जिम्मेवारी लिएको परिस्थिति सकारात्मकतिर गएकले सरकार ढल्छ भनेर भ्रम फैलाउनु निरर्थक रहने बताएका हुन्।
'अहिले पछिल्ला दिनमा सरकार ढल्छ, भन्ने विषय कम सुनिन थालेको छ। जसको सरकार ढाल्ने शक्ति हुँदैन उसले सरकार ढल्छ भन्दै हिँडने हो,' उनले भने।
उपप्रधानमन्त्री पौडेलले सरकार संविधानको रक्षा, यसको प्रभावकारी कार्यान्वयन, विकास, सुशासन र सङ्ग्रहित समस्याको स्थायी समाधानको विषय केन्द्रीत भएको बताएका छन्।
पछिल्लो अध्यादेश त्यसकै निरन्तरता रहेको उनले बताए।
'सरकारले यो कदम मुलुकका समस्याको गतिरोध तोडनका निम्ति गरेको एउटा सशक्त पहल हो,' उनले भने, 'यसका सकारात्मक नतिजा क्रमशः आउन थालेका छन्।'
उनले अध्यादेशका फरक–फरक विषय राम्रोसँग अध्ययन, छलफल गरेर आम नागरिककाबीच वास्तविकता सूचना पुर्याउन पनि आग्रह गरे।
'आम नागरिकमा विश्वास र भरोसा जगाउन सक्छौँ, देश बन्छ र मेरो भविष्य बन्छ भन्ने विश्वास जगाउन सक्छौँ र त्यसखालको अनुकूल आधार निर्माण गर्न सक्छौं भन्ने विश्वास छ,' उनले भने।
