जनता समाजवादी पार्टी (जसपा) नेपालको केन्द्रीय कार्यकारिणी समिति बैठकमा तीन विषयमा छलफल भएको छ।
शनिबारदेखि ललितपुरस्थित पार्टी केन्द्रीय कार्यालयमा सुरू भएको बैठकमा अध्यक्ष उपेन्द्र यादवले पेस गरेको तीन एजेन्डामा छलफल भएको प्रचार विभाग प्रमुख पूर्ण बस्नेतले जानकारी दिए।
बैठकमा भदौदेखि सुरू भएको 'जनतासँग जसपा नेपाल: आधारभूत संगठन निर्माण अभियान' को समीक्षा भएको छ। उक्त अभियानको समयावधि दुई महिना थप गरी माघ मसान्तसम्म पुर्याइएको थियो।
'समग्र अभियान उपलब्धीमूलक नै रह्यो भन्ने समीक्षा भयो। पार्टी फुटेको अवस्थामा संगठनको गठन र पुनर्गठनमा भएका कामहरू सन्तोषजनक रहेको निष्कर्ष छ,' उनले भने।
छलफलको अर्को विषय सरकारले ल्याएको अध्यादेश, मधेसकेन्द्रित ८ दलको मोर्चाबारे र ताप्लेजुङमा चलिरहेको मुक्कुम्लुङबारे थियो।
अर्को विषय वर्तमान अवस्थामा पार्टी संठन निर्माणलाई तीव्रता दिन कसरी अगाडि बढ्न सकिन्छ भन्नेबारे छलफल भएको बस्नेतले बताए।
त्यसबारेमा कार्यकारिणी सदस्यहरूले धारणा राखिरहेका छन्। जसपा नेपालको केन्द्रीय कार्यकारिणी समितिमा ३५ सदस्य छन्।
बैठक भोलिसम्म जारी रहनेछ।
