नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले कांग्रेस र एमालेसहितको गठबन्धनको सरकार ०८४ सम्म नटिक्ने दाबी गरेका छन्।
शनिबार दाङमा प्रेस सेन्टरले गरेको पत्रकार सम्मेलनमा अध्यक्ष प्रचण्डले ०८४ सम्म टिकिदिए हुन्थ्यो भन्ने आफूहरूको चाहना भएपनि सरकार त्यो अवधिसम्म नजाने दाबी गरेका हुन्।
‘उहाँहरू ०८४ सम्म मिलिराख्नुभयो भने हामीलाई फाइदा छ भन्ने हाम्रो विश्लेषण छ। तर साँचो कुरा भन्नुपर्छ, उहाँहरू जान सक्नुहुन्न,’ अध्यक्ष प्रचण्डले भने।
कांग्रेस र एमालेभित्र त्यसको छनक देखिइसकेको प्रचण्डको दाबी छ।
‘त्यस्तो वातावरण सुरू भइसकेको छ। नेपाली कांग्रेसका धेरै साथीहरूले ठीक भएन भनेर बोलिराख्नुभएको छ। एमालेभित्र उकुसमुकुसको स्थिति छ। यो सबै परिस्थितिमा जान्छ भन्ने लाग्दैन,’ उनले भने।
माओवादी आफै सरकार गिराउनतिर नलागेको प्रचण्डको भनाइ छ। त्यसको मतवब सरकार ठीक छ भन्ने विश्लेषण पनि आफूहरूको नरहेको उनले बताए।
‘यो सरकार आफ्नै भारीले थिच्चिएर जान्छ, हामीले केही धेरै गर्नुपर्दैन। आफ्नै भारी थाम्न नसकेर जान्छ भन्ने छ। फाल्नका लागि हामी हतारिएका छैनौं । हामी जनतामा गइरहेका छौं, अभियानमा छौं। अहिले यही नै ठीक छ,’ उनले भने।
