नेकपा माओवादी केन्द्रका केन्द्रीय सदस्यहरूले पूर्वउपराष्ट्रपतिको राजनीतिमा पुनरागमनबारे असन्तुष्टि जनाएका छन्।
अध्यक्ष पुष्पकमल दाहाल प्रचण्डको राजनीतिक प्रतिवेदनमाथि धारणा राख्ने क्रममा उनीहरूले मञ्चमा बसिरहेका पूर्वउपराष्ट्रपति नन्दबहादुर पुन फेरि राजनीतिमा आउन उपयुक्त नहुने बताएका हुन्।
माओवादी केन्द्रको कोशी प्रदेशको संसदीय दलका नेता समेत रहेका केन्द्रीय सदस्य ईन्द्र आङ्बोले पूर्वराष्ट्रपति र उपराष्ट्रपतिहरू सामाजिक काममा लाग्दा उपयुक्त हुने बताए।
‘केन्द्रको पदाधिकारीसहित सिनियर नेताले वैचारिक र खोज अनुसन्धान र अभियानहरूको जिम्मेवारी दिने नयाँ पुस्तालाई संगठनको जिम्मेवारी दिने काम गरौं,’ आङ्बोले भने, ‘पूर्वराष्ट्रपति उपराष्ट्रपतिले राजनीतिक क्षेत्रमा भन्दा पनि अमेरिकाका पूर्वराष्ट्रपति जिमी कार्टरले जस्तो क्षेत्रको काम गर्नु पर्यो।’
उनले अब पार्टीमा सही विचारको विकाससँगै विधि र पद्धतिको विकास पनि अध्यक्ष प्रचण्डकै नेतृवमा हुनुपर्ने बताए।
यसअघि केन्द्रीय सदस्यहरू सुदन किराती र लेखनाथ न्यौपानेले पनि पूर्वउपराष्ट्रपति पुन माओवादीमा सक्रिय हुन लागेको विषयमा प्रश्न उठाएका थिए।
‘पूर्वउपराष्ट्रपति राजनीतिमा आउने कुराले राम्रो सन्देश गएन, १२ हातको सरस्वतीलाई ३ हातको मन्दिरमा नराखौं,’ किरातीले केन्द्रीय कमिटी बैठकमा भने।
माओवादी नेता लेखनाथ न्यौपानेले पूर्वउपराष्ट्रपति पुनलाई लक्ष्य गर्दै सामाजिक सञ्जाल फेसबुकमा पार्टी सदस्यता त्याग गरी राज्यको माथिल्लो जिम्मेवारीमा पुगेकाहरू सक्रिय संगठनात्मक जीवनमा फर्कने प्रक्रिया पश्चगामी हुने उल्लेख गरेका छन्।
‘राष्ट्रपति, उपराष्ट्रपति, सभामुखलगायत पुन: सक्रिय संगठनात्मक जीवनमा फर्कने प्रक्रिया पश्चगामी हुन्छ। बरू सुरूमै सक्रिय संगठनात्मक जीवनमा नफर्कने व्यक्तिहरूलाई त्यस्ता जिम्मामा पठाउनु पर्छ नत्र त संगठनात्मक जीवनमा प्रवेशकाे ढाेका खुल्ला हुने तर निस्कने ढाेका सबै बन्द गर्दा नयाँहरूकाे प्रवेश हुँदैन र पार्टीको संगठनात्मक जीवन संग्रहालयमा बदलिन्छ,’ उनले भने।
पूर्वउपराष्ट्रपति नन्दबहादुर पुन (पासाङ) केन्द्रीय कमिटी बैठकमा उपाध्यक्षको लहरमा बसेका छन्। उनलाई उपाध्यक्ष बनाउन माओवादीका पदाधिकारी सहमत भइसकेका छन् तर केन्द्रीय कमिटीबाट निर्णय भइसकेको छैन।
